Студэнту, які напаў на працаўніцу Варшаўскага ўніверсітэту, выстаўленыя абвінавачванні ў забойстве 53-гадовай жанчыны з асабліваю жорсткасцю, апаганьванні яе трупа і замаху на забойства 39-гадовага работніка службы аховы ўніверсітэту, паведамляе «Gazeta Wyborcza». Выданне таксама пагаварыла са знаёмымі абвінавачанага.
22-гадовы Мешка Р. – студэнт, які 7 траўня напаў з сякерай на работнікаў Варшаўскага ўніверсітэту, у выніку чаго загінула жанчына, – быў спакойным і замкнёным, піша выданне са спасылкай на знаёмых хлопца.
Ён родам з Гдыні. Ягоны бацька – юрыст, маці – настаўніца. Падазраваны скончыў спачатку гімназію ў Гдыні, потым хадзіў у ліцэй. Спачатку ён быў у класе паводле профілю матэматыка і інфарматыка, затым у юрыдычным і гуманітарным. Школа лічыцца адной з найлепшых у горадзе.
,,«У яго былі вельмі высокія адзнакі ў школе», – сказала адна з ягоных аднакласніц.
Іншая дзяўчына з ягонага класу дадае, што ён быў вельмі ціхім, замкнёным, ні з кім не размаўляў, звяртаючыся да людзей з класу пагардліва. Адзначаецца, што хлопец быў захоплены вайсковай тэматыкай.
Яшчэ адзін школьны знаёмы распавёў, што падазраваны цікавіўся гісторыяй: маўляў, яны абмяркоўвалі гістарычныя тэмы на пераменах. Таксама ён характарызуе падазраванага як вучня, які не дастаўляў клопатаў настаўнікам.
Адзін з аднакласнікаў Мешка Р. нават называе падазраванага «антысацыяльным».
,,«Ён паказваў, а часам сам глядзеў, каментуючы з усмешкай, кадры з такіх месцаў, як Паўднёвая Амерыка або Блізкі Усход, дзе сапраўдныя банды забіваюць рэальных людзей», – дадаў ён.
Конрад Рыхтэр, які раней хадзіў разам з падазраваным на заняткі, кажа, што не памятае, каб той размаўляў.
«Заўсёды сядзеў у куце», – дадае хлопец.
Студэнтка аднаго з варшаўскіх універсітэтаў, якая вучылася ў сярэдняй школе разам з падазраваным, распавяла, што ён ніколі не казаў нічога, што б здзівіла яе ці не спадабалася б.
,,«Нашая школа была вельмі прагрэсіўнай, і ён туды ўпісваўся. Ён быў разумны, хоць і схаваны. Ён збіраў зброю. Аднойчы, падчас заняткаў у локдаўне, ён паказаў свой пакой. На сцяне вісела шмат зброі. А ён хваліўся, што ў яго мачэтэ. Ён паказваў яго на камеру», – дадала яна.
Дзяўчына распавяла, што бачыла падазраванага літаральна ў красавіку.
«Я ўбачыла яго побач са старым будынкам бібліятэкі Варшаўскага ўніверсітэту ў кампусе [дзе пазней адбылося забойства. – Заўв. рэд.] і пайшла на заняткі. Я ўсклікнула: «Прывітанне!» – і проста абняла яго. Але ён не адрэагаваў. Я звярнула ўвагу на ягоныя доўгія валасы. Затым, калі я пачула, што ў злачынца доўгія валасы, я пачала нервавацца, нешта падказвала мне, што гэта быў ён. Калі я пачула, што пасля таго як яго злавілі, ён глядзеў у адну кропку, не ўцякаў, не выяўляў ніякіх эмоцыяў, мяне гэта не здзівіла. Ён проста такі», – сказала яна.
Нападнік 7 траўня некалькі разоў ударыў сякерай 53-гадовую работніцу Варшаўскага ўніверсітэту. Універсітэцкі ахоўнік, які стаў на абарону атакаванай жанчыны, быў цяжка паранены і цяпер у шпіталі. У яго раны на галаве і руках. Цяпер ягонаму жыццю не пагражае небяспека.
Арсен Рудэнка belsat.eu
