У сярэдзіне красавіка Беларуская чыгунка прапанавала Польшчы, Літве і Латвіі ўзнавіць пасажырскі чыгуначны рух паміж краінамі. У польскім Міністэрстве ўнутраных справаў і адміністравання заявілі «Белсату», што гэтае пытанне цяпер не абмяркоўваецца і што ўсё залежыць ад цяперашніх уладаў у Менску.
Прадстаўнік БЧ на канферэнцыі Арганізацыі супрацы чыгунак у Варшаве прапанаваў Польшчы, Літве і Латвіі ўзнавіць пасажырскае спалучэнне з нашаю краінаю.
У прэс-службе Міністэрства ўнутраных справаў і адміністравання Польшчы ў адказ на запыт «Белсату» паведамілі, што цяперашнія абмежаванні ў транспартавых зносінах з Беларуссю звязаныя з міграцыйным ціскам на мяжы:
«Сітуацыя на польска-беларускай мяжы застаецца вельмі напружанай. Акты гібрыднай агрэсіі, арганізаваныя беларускімі ўладамі, працягваюцца».
У ведамстве адзначылі, што ад уладаў у Менску залежыць, ці пусцяць ізноў цягнікі паміж дзвюма краінамі:
,,«Узнаўленне гэтага спалучэння залежыць ад паводзінаў беларускага рэжыму ў дачыненні палякаў у Беларусі, тэхнічнай абароненасці дзяржаўнай мяжы, а таксама зніжэння пагрозы масавай міграцыі, у тым ліку спынення нападаў і правакацыяў з боку беларускіх службаў».
У Міністэрстве ўнутраных справаў і адміністравання падсумавалі, што пытанне ўзнаўлення пасажырскага чыгуначнага руху з Беларуссю цяпер у Варшаве нават не абмяркоўваецца.
У прэс-службе Польскай чыгункі («Polskie Koleje Państwowe») на запыт «Белсату» ўдакладнілі, што запуск пасажырскіх цягнікоў у Беларусь «залежыць ад зменаў у нарматыўных актах на ўзроўні адпаведных міністэрстваў». І нават калі такія змены адбудуцца, спатрэбіцца багата падрыхтоўчай працы:
«Патрабуецца, напрыклад, дамова аб наданні дзяржаўных паслугаў, рухомага складу, узгадненне раскладу, сістэмы цэнаўтварэння і продажу білетаў, дамоўленасцяў з памежнай і мытнай службамі, а таксама рыхтаванне персаналу для цягнікоў».
У Міністэрстве транспарту і камунікацыяў Літвы раней паведамілі «Белсату», што прапанову Менску аб узнаўленні пасажырскага чыгуначнага руху вывучаюць:
«Цяпер яна абмяркоўваецца адказнымі органамі. Калі будзе прынятая канчатковая пастанова, мы праінфармуем грамадскасць».
Праз колькі дзён прэм'ер-міністр Літвы Гінтаўтас Палуцкас заявіў, што Вільня не будзе спяшацца з адказам на прапанову Беларусі, бо гэтая ініцыятыва «разглядаецца ў кантэксце санкцыяў, вайны ва Украіне і стасункаў Еўразвязу з Расеяй».
У Латвіі гэтай прапановы яшчэ не каментавалі.
Пасажырскі чыгуначны рух паміж Беларуссю і суседнімі краінамі ЕЗ прыпыніўся ў 2020 годзе праз COVID-19. Аднак калі пандэмія сціхла, цягнікі так і не вярнуліся, бо на той момант мяжу ўжо штурмавалі нерэгулярныя мігранты.
Дар'я Форман, Сцяпан Кубік belsat.eu
