Актывіста Змітра Грынкевіча, які жыў у Батумі і займаўся продажам беларускай і ўкраінскай сімволікі, 8 траўня не пусцілі ў Грузію пасля візарану, паведамляе радыё «Рацыя».
Паводле Змітра, яго трымалі на грузінска-армянскай мяжы недзе паўтары гадзіны і старанна вывучалі ягоны пашпарт.
,,«А пасля вынеслі паперу, сказалі, вывелі і ўсё. Трэба спачатку знайсці, дзе прыткнуцца. А там ужо глядзець, што далей рабіць. Я ўяўлення не маю пакуль, я не цікавіўся, куды там і што можна. Я спачатку застануся ў зоне, дзе цягне інтэрнэт», – распавёў Зміцер.
Праваабаронца Раман Кісляк, які ўжо другі год судзіцца за права на міжнародную абарону ў Грузіі, назваў забарону на ўезду Змітру Грынкевічу ўдарам па беларускай дыяспары Аджарыі.
«Тое, што не пусцілі сёння Змітра ў Грузію, адмовілі ва ўездзе, азначае, што грузінскі ўрад не хоча, каб тут, у Грузіі, была моцная беларуская дыяспара. Найбольш актыўных дзеячаў дыяспары, у тым ліку Змітра, яны якраз на візаране трымаюць, не даюць вярнуцца ў Грузію».
Зміцер жыў у Батумі больш за два гады, браў актыўны ўдзел у акцыях беларускай дыяспары, займаўся продажам беларускай і ўкраінскай сімволікі.
На пачатку красавіка ў Грузію таксама не пусцілі іншага беларуса, у якога ў Батумі засталіся жонка з дзіцём.
Цягам 2023–2024 гадоў колькасць грамадзянаў Беларусі ў Грузіі зменшылася больш чым на тысячу чалавек.
Паводле стану на 1 студзеня 2025 года ў Грузіі жылі 12 808 беларусаў. З 2021 года ў краіну прыехалі 20 952 асобаў, выехалі – 8144.
За апошнія пяць гадоў, з 2019 да 2024 года, грузінскія ўлады не задаволілі ніводнага прашэння ад беларусаў на наданне прытулку. Таксама за гэты час адбылося некалькі выпадкаў, калі беларусаў не пускалі ў краіну пасля візарану.
Паводле звестак грузінскага МУС, у першым квартале 2025 года Грузія адмовіла ў міжнароднай абароне 13 беларусам, у тым ліку – двум няпоўнагадовым. Агульная колькасць адмоваў з 2019 года – 69, з іх 15 чалавек – няпоўнагадовыя.
Таксама нядаўна грузінскі ўрад абвясціў маштабныя змяненні міграцыйнага заканадаўства краіны. Цяпер уладам будзе прасцей дэпартаваць замежнікаў. Падставамі для выдварэння з краіны могуць стаць у тым ліку дробнае хуліганства, непадпарадкаванне паліцыі, абраза службовай асобы, удзел у несанкцыянаваных акцыях.
Акрамя дэпартацыі, замежніку могуць забараніць уязджаць у Грузію на тэрмін ад 2 да 20 гадоў ці пажыццёва.
Дэпартаваць замежнікаў змогуць нават пры легальным перабыванні ў краіне і наяўнасці віду на жыхарства.
Прасіць прытулку ў Грузіі цяпер можна будзе цягам 10 дзён пасля размяшчэння ў турму ці 30 дзён пасля прыезду ў краіну. Калі чалавек не прайшоў гэты этап дапушчальнасці, ён не будзе лічыцца спашукальнікам прытулку і можа быць неадкладна дэпартаваны. Пры гэтым, аднак, зазначаецца, што нельга будзе дэпартаваць у краіны, дзе асобе пагражае пераслед за палітычныя погляды, і дапускаецца дэпартацыя ў трэція краіны.
Марыя Міхалевіч belsat.eu
