Міністэрства замежных справаў Літвы ініцыюе змены ў заканадаўстве, якія дазволяць уводзіць нацыянальныя эканамічныя санкцыі супраць Беларусі і Расеі нават без згоды з Еўразвязам.
Як паведамляе выданне The Baltic Times, паводле Літвы, такія меры патрэбныя на выпадак, калі Вугоршчына заблакуе падаўжэнне агульнаеўрапейскіх санкцыяў у ліпені 2025 года. Таму ўлады Літвы хочуць пакінуць за сабой права самастойна блакаваць увоз тавараў і абмяжоўваць гандаль.
Галоўная дарадца прэзідэнта Літвы па знешняй палітыцы Аста Скайсгірытэ падкрэсліла, што да магчымых «рэгіянальных санкцыяў» могуць далучыцца Польшча, краіны Балтыі, Фінляндыя і іншыя дзяржавы Паўночнай Еўропы.
«У ідэале мэтай павінна быць падаўжэнне санкцыяў ЕЗ супраць Масквы – крок, які ўжо атрымлівалася рэалізаваць, нягледзячы на пярэчанні Вугоршчыны», – заявіла яна.
Як адзначае міністр замежных справаў Літвы Кястуціс Будрыс, важным крокам было б стварэнне рэгіянальнага пагаднення паміж краінамі, што мяжуюць з Расеяй і Беларуссю з мэтай перакрыць увоз тавараў у Еўразвяз праз сухапутныя пераходы.
«Было б някепска дасягнуць хаця б рэгіянальнай дамоўленасці…», – сказаў Будрыс у інтэрв’ю агенцтву BNS.
Нагадаем, апошні пакет еўрапейскіх санкцыяў супраць Беларусі быў прыняты 27 сакавіка 2025 года – ён уключаў 25 фізічных і 7 юрыдычных асобаў. Аднак падаўжэнне дзеяння нацыянальнага закона аб санкцыях у Літве 17 красавіка не прайшло без дыскусіяў: парламент адхіліў прапанову кансерватараў зраўняць санкцыі для беларусаў з расейцамі.
Надзея Вольная belsat.eu
