Спікерка КР Анжаліка Мельнікава кіравала фондам «Białoruś Liberty», куды меўся прыйсці грант для Рады, акрамя таго, праз гэтую юрыдычную асобу дапамогу ад донараў атрымоўвалі «Кіберпартызаны». Прадстаўніца ініцыятывы Юліяна Шаметавец паведаміла «Белсату», што новы кіраўнік фонду мае атрымаць доступ да рахункаў цягам некалькіх тыдняў.
9 красавіка заснаваны Анжалікай Мельнікавай фонд «Białoruś Liberty» ўзначаліў Віталь Пацехін – былы вайсковец, якога ў Беларусі завочна асудзілі паводле абвінавачвання ў атацы дрона на базу АМАПу. З таго моманту мінуў амаль месяц, аднак доступу да рахункаў арганізацыі дасюль няма, сказала «Белсату» старшыня нагляднай рады фонду, прадстаўніца «Кіберпартызанаў» Юліяна Шаметавец:
«Ён быў прызначаны толькі ў адной сістэме, пасля трэба было таксама мяняць у іншых. Плюс ён адсутнічаў, быў у планавай паездцы, і першы раз пайшоў у банк на мінулым тыдні».
Як сказала Шаметавец, асаблівых праблемаў тут няма: «звычайная бюракратыя, дый выходныя». Яна ўважае, што доступ да рахункаў з'явіцца ў хуткім часе:
«Спадзяюся, цягам найбліжэйшых тыдняў».
Раней крыніца «Белсату» ў МЗС Польшчы казала, што грошы з рахункаў фонду былі знятыя. Праўда, невядома, хто гэта зрабіў: ці сама Мельнікава, ці нехта іншы, а калі Мельнікава – то ці добраахвотна, ці пад прымусам.
Раней у арганізацыю прыйшоў грант для Каардынацыйнай рады, каля 100 тысячаў еўраў. Акрамя таго, праз гэты фонд дапамогу ад донараў атрымоўвалі «Кіберпартызаны», на рахунку было «некалькі дзясяткаў тысяч долараў» на «Партызанскі Тэлеграм», на менеджмент і развіццё базаў звестак.
Анжаліка Мельнікава перастала выходзіць на сувязь 25 сакавіка. Месяцам раней яна пакінула тэрыторыю Польшчы і Еўразвязу. Паводле сузаснавальніка «BY_Help» і «BYSOL» Аляксея Лявончыка, Мельнікава «стоадсоткава» прылятала ў Лондан, аднак надоўга там не затрымалася і паляцела далей. Куды – не кажа.
Кіраўнік арганізацыі «BYPOL» Аляксандр Азараў раскрыў «Белсату» «найбольш імаверную» версію знікнення: Мельнікава паляцела адпачываць на Кубу, дзе ўжо была, там яе затрымалі і выдалі рэжыму Аляксандра Лукашэнкі.
У Польшчы заведзеная крымінальная справа паводле факту знікнення былой спікеркі Каардынацыйнае рады. Сярод версіяў, што разглядаюцца праваахоўнікамі, – незаконнае пазбаўленне волі.
Сцяпан Кубік belsat.eu
