За шматлікія адзіночныя пікеты з «дэманстрацыяй нацыянальнай сімволікі» ў Менску.
Супраць вядомай грамадскай актывісткі Ніны Багінскай завялі крымінальную справу паводле арт. 342-2 Крымінальнага кодэксу («Неаднаразовае парушэнне парадку арганізацыі або правядзення масавых мерапрыемстваў»), піша праваабарончы цэнтр «Вясна».
Як стала вядома праваабаронцам «Вясны», Ніну Багінскую ў 2024 годзе тройчы прыцягвалі да адміністратыўнай адказнасці паводле арт. 24.23 («Несанкцыянаванае пікетаванне»). Агульная сума штрафаў склала 7200 рублёў (180 базавых велічыняў). Апроч гэтага, на яе складзеныя яшчэ пяць пратаколаў.
Прычынай для адміністрацыйнага пераследу быў шпацыр па цэнтру Менску са значкам бел-чырвона-белага колеру на адзенні, а таксама неаднаразовая «дэманстрацыя бел-чырвона-белай сімволікі» на вуліцах сталіцы.
Ніну Багінскую неаднаразова затрымлівалі, нават прэвентыўна: сілавікі прыходзілі да яе дадому на важныя нацыянальныя святы. Актывістка прынцыпова не хадзіла на свае суды.
У выніку супраць Ніны Багінскай завялі крымінальную справу паводле арт. 342-2, уведзенага ў Крымінальны кодэкс толькі ў 2021 годзе, – за пратэсную актыўнасць грамадства. Падчас следства паводле крымінальнай справы жанчыну некалькі разоў вазілі на псіхіятрычную экспертызу.
Нагадаем, міліцыянты затрымалі актывістку 19 кастрычніка на скрыжаванні праспекту Незалежнасці і вуліцы Казлова, калі спадарыня Ніна з плакатам: «БНФ» рушыла да будынку, дзе некалі месцілася сядзіба партыі БНФ. Яна хацела такім чынам нагадаць грамадскасці, што ў той дзень 36 гадоў таму быў створаны аргкамітэт Беларускага народнага фронту, з якога пачаўся самы масавы апазіцыйны рух у Беларусі. У Савецкім РУУС на Ніну Багінскую быў складзены адміністратыўны пратакол, які яна адмовілася прачытаць і падпісаць.
Актывістка з канца 1980-х удзельнічае ў вулічных акцыях апазіцыі, а таксама ладзіць іх самастойна. Яе часта штрафавалі, сума штрафаў пераваліла за 20 тысяч долараў. Грошы вылічваюць з пенсіі спадарыні Багінскай, але, паколькі ўлады палічылі, што гэтага недастаткова, то ў пенсіянеркі канфіскавалі дачу з зямельным надзелам. Акрамя таго, жанчыне забаронена да пагашэння доўгу карыстацца паслугамі мабільнай сувязі.
Тэса Анэйда belsat.eu
