У звязку з рыхтаваннем да параду Перамогі ў Маскве з Беларусі часова вывелі расейскую зенітна-ракетную сістэму С-300/400.
Пра гэта паведамляе выданне «Флагшток» са спасылкаю на ўкраінскі маніторынгавы канал «КіберБорошно», які спецыялізуецца на геалакацыі вайсковай тэхнікі паводле фотаздымкаў.
Прадстаўнікі тэлеграм-каналу адмовіліся даваць дадатковую інфармацыю на запыт журналістаў выдання.
Паводле адкрытых крыніцаў, пасля пачатку поўнамаштабнага ўварвання Расеі ва Украіну ў 2022 годзе расейскія падраздзяленні супрацьпаветранай абароны знаходзіліся на тэрыторыі Гомельскай вобласці, у прыватнасці – у Гомельскім і Мазырскім раёнах.
Пра пастаўкі сродкаў супрацьпаветранай і супрацьракетнай абароны ў Беларусь таксама паведамлялі ў траўні 2023 года. Тады адзначалася, што на «баявое дзяжурства» заступяць новы камплект комплексу С-400 і падрыхтаваныя беларускія зенітчыкі. Паводле звестак «Беларускага Гаюна», камплект ЗРК С-400, атрыманы з РФ, прыбыў на тэрыторыю 6-га зенітнага ракетнага дывізіёну 15-й зенітнай ракетнай брыгады, размешчанай у ваколіцах Дубровы (Смалявіцкі раён Менскай вобласці).
Нагадаем, што прэзідэнт Украіны Уладзімір Зяленскі заявіў: ягоная краіна не можа гарантаваць бяспекі замежным гасцям, якія наведаюць парад 9 траўня ў Маскве. Ён падкрэсліў, што Расея ў любы момант можа справакаваць інцыдэнты з удзелам сваіх гасцей, а затым абвінаваціць у гэтым іншых.
Таксама Зяленскі выказаў гатовасць Украіны да перамір’я, але не на тры дні, як прапануе Расея, а на месяц. Ён упершыню публічна адхіліў ініцыятыву трохдзённага спынення агню, якую Уладзімір Пуцін агучыў 28 красавіка: «Гэта проста вялікая тэатральная пастаноўка».
Паводле расейскіх СМІ, удзел у захадах на 9 траўня ў Маскве пацвердзілі прадстаўнікі 19 краінаў. Сярод тых, хто плануе прыехаць у сталіцу РФ, – кітайскі лідар Сі Цзінь Пін. Ён мае намер быць у Расеі з 7 да 10 траўня і абмеркаваць з Уладзімірам Пуціным пытанні стратэгічнага партнёрства. Паведамляецца таксама, што Пекін хоча спрыяць пачатку мірных перамоваў.
Раман Шавель belsat.eu
