На Мазырскім НПЗ прайшла чарада затрыманняў сярод топавых кіраўнікоў прадпрыемства. Пра гэта паведамляе «Флагшток» са спасылкай на крыніцу, звязаную з дзейнасцю прадпрыемства.
Паводле звестак выдання, затрыманыя пяць чалавек. Вядомыя пасады двух з іх: начальнік юрыдычнай службы і дырэктар дырэкцыі па рэканструкцыі і развіццю. У публікацыях завадскіх СМІ апошнімі на гэтых пасадах згадваліся Драгель Ігар Валянцінавіч і Гуд Аляксандр Анатольевіч.
Таксама паведамляецца, што была затрыманая жонка аднаго з кіраўнікоў.
Напярэдадні 1 траўня генеральны дырэктар заводу Віталь Паўлаў быў вельмі злы і зрываўся на падначаленых, паведаміла крыніца выдання. Работнікі прадпрыемства мяркуюць, што прычынай затрымання стала карупцыя, а не палітычна матываваныя справы, з нагоды якіх раней на заводзе праходзілі чысткі.
Мазырскі НПЗ – адзін з двух нафтаперапрацоўчых заводаў у Беларусі. Прадпрыемства застаецца пад заходнімі санкцыямі. Да пачатку поўнамаштабнай вайны ва Украіне завод добра зарабляў на экспарце сваёй прадукцыі ва Украіну і Еўропу.
Арсен Рудэнка belsat.eu
