навіны

Арцём Брухан пойдзе ў спікеры Каардынацыйнае рады ад фракцыі Латушкі

img
Намеснік кіраўніка НАУ Арцём Брухан. Фота: belarus-nau.org
podpis źródła zdjęcia

Намеснік кіраўніка НАУ Арцём Брухан пацвердзіў «Белсату», што фракцыя «Каманда Латушкі і Рух"За свабоду"» вылучыць ягоную кандыдатуру на пост спікера Каардынацыйнае рады. Свае планы на гэтай пасадзе ён раскрываць адмовіўся.

«Наша ніва» сёння напісала, што намеснік кіраўніка НАУ, намеснік прадстаўніка ў транзіце ўлады Аб'яднанага пераходнага кабінету Арцём Брухан, «хутчэй за ўсё», стане новым спікерам Каардынацыйнае рады.


У каментары «Белсату» ён пацвердзіў, што фракцыя «Каманда Латушкі і Рух "За свабоду"» зацвердзіла ягоную кандыдатуру на выбарах спікера:

,,

«Гэта агульнае рашэнне нашай фракцыі, мы правялі некалькі раўндаў кансультацыяў унутры фракцыі. Мая кандыдатура будзе высоўвацца на пасаду пасля таго, як будзе афіцыйна прызначаная дата выбараў».


Паводле Брухана, канчатковая пастанова была прынятая некалькі дзён таму, аднак пра гэта не паведамлялі, бо яшчэ не зацверджаная дата выбараў старшыні Рады.

Стася Гліннік у студыі «Белсату». Варшава, Польшча. 22 красавіка 2025 года. Скрыншот: Белсат News / Youtube

Выканальніца абавязкаў Мельнікавай не захацела аўтаматычна станавіцца спікеркай КР

навіны

Сваіх планаў на пасадзе спікера ў выпадку абрання палітык раскрываць не стаў:


«Я бы хацеў іх агучыць пасля таго, як будзе прызначаная дата выбараў, будзе пасяджэнне КР, каб таксама гэта абмеркаваць на агульным пасяджэнні Рады».


Брухан паведаміў, што калі яго абяруць спікерам Каардынацыйнай рады, ён пакіне сваю пасаду ў Аб'яднаным пераходным кабінеце.


Палітык таксама пракаментаваў сцвярджэнне «Нашай нівы», што «менавіта Павел Латушка вызначае, хто будзе спікерам Каардынацыйнай рады», бо найбольшую колькасць галасоў у КР мае ягоная фракцыя:

,,

«Мне не хацелася б крытыкаваць медыі, але такія заявы не адпавядаюць рэчаіснасці. Не пагаджаюся з гэтым катэгарычна. У Каардынацыйнай радзе 80 асобаў, у нашай фракцыі цяпер 27 галасоў (не можа галасаваць Анжаліка Мельнікава), і гэтага недастаткова, каб абраць спікера».


Камісія ў пытаннях статуту Каардынацыйнай рады раней рэкамендавала правесці выбары спікера 13 траўня. Гэтая пасада вызвалілася пасля знікнення Мельнікавай. Выканальніца ейных абавязкаў, віцэ-спікерка КР Станіслава Гліннік у эфіры «Белсату» казала, што не будзе карыстацца правам аўтаматычна ўзначаліць Раду:


«Я буду браць самаадвод, і мы будзем выбіраць спікера».


Сцяпан Кубік belsat.eu

больш па гэтай тэме Глядзіце больш
Item 1 of 4
апошнія
Item 1 of 10