У цэнтры Гомля аднавілася добрая, здавалася б, ініцыятыва – вулічныя кінапаказы. Але замест сучасных фільмаў гледачам, як і летась, прапанавалі савецкую класіку. Ідэя, якая магла б стаць папулярнай, выклікае расчараванне, асабліва сярод моладзі.
1 траўня ў скверы імя Грамыкі ў Гомлі распачаўся новы сезон летніх кінапаказаў пад адкрытым небам. Першы фільм – «Вясна на Зарэчнай вуліцы», чорна-белая стужка 1956 года. Рэакцыя гомельцаў у сацыяльных сетках прыкладна такая: цікавая ідэя ператвараецца ў фармальнасць, бо публіцы ўпарта навязваюць выключна савецкі рэпертуар.
,,«Чаму нельга паказаць сучасны фільм, які спадабаецца і маладым, і старэйшым? Навошта нас пастаянна вяртаюць у "савок"? Ідэя ж класная! Я б з задавальненнем хадзіла, і сябровак бы брала – лепш, чым піва на лаўцы піць. Але калі цябе зноў і зноў нашпігоўваюць СССРам... На сярэдзіне паказу палова гледачоў сышла», – абураецца адна з каментатарак.
І сапраўды. На фота з месца паказу відаць, што публіка – пераважна моладзь і вольных месцаў сапраўды шмат.
Калі гаворка ідзе пра аўтарскія правы на сучасныя фільмы – гэта справа, якую, на думку гомельцаў, мог бы ўладкаваць «Гомелькінавідэапракат». А паказваць можна было б і без выдаткаў – напрыклад, праз афіцыйны YouTube-канал «Беларусьфільму», дзе размешчаныя не толькі стужкі з савецкім духам, але і фільмы паводле раманаў Караткевіча ці іншых беларускіх класікаў.
Як высветліў «Белсат», ініцыятарам вулічных паказаў стаў старшыня Гомельскага гарвыканкаму Уладзімір Прывалаў. Ён вядомы ў горадзе як прыхільнік савецкай эпохі, у тым ліку яе эстрады. Гэта тлумачыць рэпертуар, але не супакойвае гледачоў.
Надзея, аднак, ёсць. Паводле дзяржаўных СМІ, у гэтым сезоне ў Гомлі з’явяцца і іншыя пляцоўкі – напрыклад, міні-кіназалы на ўзбярэжжы Сожу і ў цэнтральным парку.
«Старшыня гарвыканкаму Уладзімір Прывалаў адпрацаваў тэму арганізацыі летніх вулічных кінатэатраў з зацікаўленымі службамі. Увага была нададзеная выбару пляцовак у кожным раёне гораду, каб зрабіць гэты від вольнага часу даступным для ўсіх гомельцаў», – паведамілі ў гарвыканкаме.
Мясцовыя ўлады абяцаюць, што летні сезон будзе насычаным і поўным прыемных сюрпрызаў для людзей усіх узростаў. А вось ці ўбачым мы на экране штось, акрамя нязменнага «Масфільму», – пытанне адкрытае.
Надзея Вольная belsat.eu
