Дэпартацыя пакістанцаў з Індыі на радзіму і маштабнае адлучэнне электраэнергіі ў Іспаніі і Партугаліі. Фатаграфіі тыдня
04.05.2025, 06:24
Мужчыны размаўляюць на фоне разбурэнняў, выкліканых атакай беспілотніка «Shahed» на базу Украінскага Чырвонага Крыжа і кавярню ў Дабрапіллі, Данецкая вобласць, Украіна. 30 красавіка 2025 года. Фота: Jose Colon / Anadolu / Abaca Press / East News
podpis źródła zdjęcia
Пагаршэнне стасункаў паміж Пакістанам і Індыяй на фоне тэракту ў Кашміры, акцыя салідарнасці з украінскімі ваеннапалоннымі ў Кіеве, мітынг з нагоды Дня працы ў Парыжы – сабралі галоўныя здымкі за тыдзень.
Тысячы людзей удзельнічаюць у мітынгу з нагоды Дня працы ў Парыжы, Францыя. 1 траўня 2025 года. Фота: Annice Lyn / Getty Images
Дзяўчына назірае за феерверкам падчас святкавання 50-годдзя заканчэння вайны ў Вʼетнаме ў горадзе Хашымін, Вʼетнам. 30 красавіка 2025 года. Фота: Achmad Ibrahim / AP / East News
Людзі стаяць на каленях падчас мітынгу з заклікам вызваліць украінскіх ваеннапалонных і вярнуць целы загінулых жаўнераў з перадавой. Кіеў, Украіна. 2 траўня 2025 года. Фота: Danylo Antoniuk / Anadolu via Getty Images
Палестынцы атрымліваюць гарачую ежу ў цэнтры размеркавання харчоў у лагеры для бежанцаў Нусейрат у цэнтральнай частцы сектару Газа. Як заявіў Міжнародны камітэт Чырвонага Крыжа, сітуацыя з гуманітарнай дапамогай у сектары Газа крытычная. З 2 сакавіка Ізраіль блакуе паступленне ў Газу харчоў, лекаў, паліва і іншай жыццёва важнай дапамогі. 30 красавіка 2025 года. Фота: Eyad Baba / AFP / East News
Кардыналы прысутнічаюць на імшы ў пяты з дзевяці дзён жалобы па памерлым Папу Францішку ў базіліцы Святога Пятра ў Ватыкане. Францішак, 266-ы Папа, які займаў Апостальскую Сталіцу з 13 сакавіка 2013 года, памёр 25 красавіка 2025 года ва ўзросце 88 гадоў. Канклаў, на якім кардыналы абяруць новага Папу, пачнецца 7 траўня і пройдзе ў Сікстынскай капэле ў Ватыкане. 30 красавіка 2025 года. Фота: Alessandra Tarantino / AP Photo / East News
Грамадзянка Пакістану развітваецца са сваім сынам, грамадзянінам Індыі, рыхтуючыся вярнуцца на радзіму праз КПП Ўага. Індыйскія і пакістанскія жаўнеры пятую ноч запар абменьваюцца агнём у Кашміры пасля нападу баевікоў на турыстаў. У адказ на тэракт Нью-Дэлі панізіў узровень дыпламатычных стасункаў, скасаваў візы для грамадзянаў Пакістану, прыпыніў дзеянне дамовы аб размеркаванні вады і абвясціў пра закрыццё галоўнага памежпераходу з Пакістанам. 29 красавіка 2025 года. Фота: Narinder Nanu / AFP / East News
Аўтамабіль едзе па неасветленай вуліцы ў Лісабоне падчас маштабнага адлучэння электраэнергіі ў Партугаліі. Адлучэнне адбылося ўдзень 28 красавіка і закранула таксама Іспанію. У выніку былі парушэнні ў працы чыгуначнага транспарту, адмененыя сотні авіярэйсаў, закрытыя крамы і часткова прыпынілі працу больніцы. Прычына спынення падачы электраэнергіі невядомая. 28 красавіка 2025 года. Фота: Armando Franca / AP Photo / East News
