Віцэ-прэзідэнт Джэймз Дэйвід Вэнс у каментары «Fox News» выказаўся наконт працягу мірных перамоваў паміж Украінай і Расеяй. Гэтую тэму ён закрануў, падсумоўваючы першыя 100 дзён прэзідэнта ЗША Доналда Трампа, які абяцаў скончыць вайну за 24 гадзіны.
Дж. Д. Вэнс сказаў, што ў ЗША «ёсць шмат пытанняў вонкавай палітыкі, над якімі мы працуем і якія, я думаю, так ці інакш будуць зрэалізаваныя цягам наступных 100 дзён».
«Ён [Доналд Трамп. – рэд. belsat.eu] хацеў бы прывесці расейска-ўкраінскі канфлікт да доўгатэрміновага развязання, пры якім не будзе гінуць па 5000 чалавек кожны тыдзень з абодвух бакоў гэтага канфлікту», – заявіў віцэ-прэзідэнт.
Паводле Вэнса, «першы і неабходны крок да развязання расейска-ўкраінскага канфлікту – прымусіць кожнага з яго бакоў зрабіць мірную прапанову».
,,«І гэта сапраўды адбылося. Украінцы сказалі: «Вось чаго мы хочам». Расейцы сказалі: «Вось чаго мы хочам». І цяпер задача дыпламатыі – паспрабаваць неяк зблізіць гэтыя два бакі», – сказаў Вэнс.
Пры гэтым палітык прызнаў, што «існуе вельмі вялікая прорва паміж тым, чаго хочуць расейцы, і тым, чаго хочуць украінцы».
Вэнс назваў дасягненнем першых 100 дзён Трампа тое, што бакі пачалі размаўляць адзін з адным, бо раней «яны проста змагаліся».
«Такім чынам, у нас ёсць гэты першы крок. Мы вылучылі і апублікавалі мірную прапанову, і мы будзем вельмі старанна працаваць цягам наступных 100 дзён, каб паспрабаваць звесці гэтых хлопцаў», – падкрэсліў віцэ-прэзідэнт ЗША.
30 сакавіка пасля дамовы паміж прэзідэнтамі Уладзімірам Зяленскім і Доналдам Трампам адбылося падпісанне Угоды пра стварэнне Інвестыцыйнага фонду ўзнаўлення паміж ЗША і Украінаю, якую яшчэ часам называюць пагадненнем аб нетрах або карысных выкапнях. Эксперты называюць дакумент гістарычным. Пад пагадненнем паставілі подпісы міністр фінансаў ЗША Скот Бэсэнт і міністарка эканомікі Украіны Юлія Свырыдэнка.
Якуб Хруст belsat.eu
