Дом кіно, былы кінатэатр «Партызан», перадалі пралукашэнкаўскай арганізацыі Беларускі рэспубліканскі саюз моладзі. Пра гэта паведамілі крыніцы «Белсату». Учора ўвечары, 30 красавіка, быў апошні сеанс. Сёння будынак зачынены. Работнікаў Дому кіно звольнілі.
Дом кіно месціўся ў будынку былога кінатэатру «Партызан» з 2005 года. Кінатэатр быў папулярным месцам адпачынку менчукоў. Пасля рамонту змянілася шыльда, і кінатэатр атрымаў назву «Дом кіно». Цяпер там кіназала на 584 месцы з VIP-шэрагам на 26 месцаў. Тэхнічнае абсталяванне – сістэма аб'ёмнага агучвання «Dolby Digital EX», электронны кінапраектар «Kinoton» і лічбавы відэапраектар.
У Доме кіно дзеяла некалькі кінапраектаў, сярод якіх – Фэст новага нямецкага кіно. Ён праходзіў штогод у верасні. Наведнікі мелі магчымасць паглядзець самыя яркія фестывальныя нямецкія карціны. «Кінаманія» два разы на месяц знаёміла гледачоў з лепшымі фільмамі Міжнароднага Канскага фестывалю. «Акно ў Венецыю» прапанавала карціны з Міжнароднага Венецыянскага фестывалю. «КінаАрт па-беларуску» дэманстраваў кароткаметражныя фільмы беларускіх аўтараў, у тым ліку студэнтаў Акадэміі мастацтваў.
Акрамя камфартабельнай кіназалы ў Доме кіно ёсць яшчэ канферэнц-зала на 50 чалавек. На другім паверсе перыядычна выстаўляюцца карціны беларускіх мастакоў. Але самая вядомая славутасць былога кінатэатру «Партызан» – гэта манументальная мазаіка знакамітых творцаў Мая Данцыга і Барыса Няпомняшчага «Партызаны», або «Партызанскі паход».
Кінатэатр «Дом кіно» – у муніцыпальнай уласнасці ўнітарнага прадпрыемства «Кінавідэапракат» Менскага гарадскога выканаўчага камітэту. У час БССР з 1975 года месціўся ў будынку ў Чырвонага касцёлу. Там былі дзве залы і музей кінематаграфіі. Вернікам будынак касцёлу вярнулі ў 1990-ыя.
З 26 верасня 2022 года дзверы Чырвонага касцёлу для вернікаў ізноў зачыненыя.
Любоў Лунёва belsat.eu
