Аляксандр Лукашэнка на сустрэчы з Уладзімірам Пуціным раптоўна загаварыў пра георгіеўскую стужку і запэўніў, што ў Беларусі яна не забароненая. «Белсат» пацікавіўся ў лукашэнкаўскіх ідэолагаў, ці можна выходзіць на вуліцу з гэтым сімвалам.
«Ніхто не забараняе ні ў якім разе георгіеўскія стужкі. У нас гэта колеры нашага, як многія нас папракаюць, савецкага, сцяга. І шэсце "Беларусь памятае" падобнае да вашага шэсця "Несмяротнага палка". Нічога кепскага не бачу: калі нехта хоча георгіеўскую стужку, нехта хоча "Беларусь памятае" – гэтыя знакі разам ідуць», – заявіў Аляксандр Лукашэнка на сустрэчы з Уладзімірам Пуціным 29 красавіка ў Валгаградзе.
Лукашэнка пры гэтым параіў суразмоўцу вывучыць гістарычную даведку пра георгіеўскую стужку, заявіўшы, што яе гісторыя «ўсё-ткі своеасаблівая».
«З георгіеўскімі стужкамі могуць выходзіць расейцы»
Георгіеўскія стужкі, што раней зрабіліся ў суседняй краіне сімвалам перамогі ў Вялікай Айчыннай, а пасля пачатку вайны ва Украіне – сімвалам расейскай агрэсіі, у Беларусі нібыта і не забароненыя, а нібыта – і так.
У аддзеле ідэалагічнай працы Лагойскага райвыканкаму карэспандэнту «Белсату» як прыватнай асобе сказалі, што ў Беларусі маецца свая акцыя і свой сімвал, таму беларусам чорна-жоўтай стужкі выкарыстоўваць не варта:
,,«Беларусы маюць сваю сімволіку, сваю акцыю. У нас жа няма "Несмяротнага палка", у нас ёсць уласная акцыя "Беларусь памятае". З георгіеўскімі стужкамі могуць выходзіць расейцы. Мы выходзім з нашымі бутаньеркамі».
На адкрытае пытанне, ці можна беларусам выкарыстоўваць георгіеўскую стужку, суразмоўніца адказала: «Не». Яна пры гэтым запэўніла, што ніякай забароны не існуе:
«Будзем казаць так: беларусы маюць сваё, нацыянальнае. Ніхто ж не кажа, што гэта забарона. Калі да нас прыязджаюць, напрыклад, грамадзяне Расеі і бяруць удзел у імпрэзах, то яны ідуць з георгіеўскай стужкаю і нашай бутаньеркаю. А калі вы жывяце ў Беларусі, то, натуральна, лепш пачапіць бутаньерку. Гэта слушна, гэта больш патрыятычна».
Ці затрымаюць за георгіеўскую стужку?
Ва ўпраўленні ідэалагічнай працы Берасцейскага гарвыканкаму таксама параілі не насіць георгіеўскай стужкі, хаця яна і не забароненая:
«У Беларусі ёсць зацверджаная сімволіка, яе і варта выкарыстоўваць».
На пытанне, ці затрымаюць на вуліцы, калі выйсці з чорна-жоўтаю стужкаю, чыноўніца адказала так:
«Выкарыстоўвайце нацыянальную сімволіку – і ўсё будзе добра. Не перажывайце».
Георгіеўская стужка забароненая ў некаторых краінах як прапаганда ваеннай агрэсіі. Такое абмежаванне дзее ва Украіне, у Літве, Латвіі, Эстоніі, Малдове, Нямеччыне.
Дар'я Форман, Сцяпан Кубік belsat.eu
