У чацвер на большай частцы краіны будзе моцны вецер, а ў пятніцу – нават замаразкі.
Белгідрамет абвясціў пра аранжавы ўзровень небяспекі на травеньскія святы. У чацвер 1 траўня практычна на ўсёй тэрыторыі Беларусі будзе штармавы вецер з парывамі да 15–20 м/с, а ў Менску – да 15–18 м/с. Тэмпература таксама ўпадзе: 1 траўня яна будзе вагацца ад плюс 7 °С у Віцебску да плюс 18 °С у Берасці, але праз вецер усюды будзе адчувацца значна халадней.
А ноччу ў пятніцу 2 траўня рэзка пахаладае: на большай частцы тэрыторыі чакаюцца замаразкі да мінус 5°С, у Менску – да мінус 3°С. Так што накрывайце сваю расаду, якая праз холад можа загінуць.
Як падрыхтавацца да штармавога ветру:
- Прыбярыце з двара і гаўбца ўсе рэчы, якія можа панесці ветрам, у закрытыя памяшканні;
- Абрэжце сухія галінкі і дрэвы, што могуць зламацца і зваліцца на нешта каштоўнае;
- Аўтамабіль пастаўце ў гараж або прыпаркуйце яго далей ад дрэваў;
- На вуліцы ўважліва глядзіце па баках і не стойце пад хісткімі збудаваннямі ці дрэвамі.
Тэса Анэйда belsat.eu
