Аляксандр Лукашэнка 29 красавіка зноў скіраваўся з візітам у Расею, паведамілі ў ягонай прэсавай службе. Ён ужо быў у РФ у сакавіку, але яшчэ плануе прыляцець туды ў траўні.
У Валгаградзе Аляксандр Лукашэнка разам з Уладзімірам Пуціным возьме ўдзел у форуме, прысвечаным «абароне гістарычнай памяці аб падзеях Вялікай Айчыннай вайны», хоць і ў Беларусі, і ў Расеі гісторыю ВАВ мэтанакіравана вылучаюць з гісторыі Другой сусветнай вайны.
Чакаецца, што Лукашэнка і Пуцін правядуць асобную сустрэчу, падчас якой абмяркуюць пытанні двухбаковай супрацы, сітуацыю ў рэгіёне і міжнародны парадак дня.
З 13 да 15 сакавіка Лукашэнка тры дні быў з візітам у Расеі, дзе таксама сустракаўся з Пуціным. Таксама яго чакаюць у Маскве 9 траўня. Апроч таго, Лукашэнка з пачатку года ўжо чатыры разы стэлефаноўваўся з Пуціным: 19 і 27 студзеня, 20 сакавіка і 7 красавіка. Ні з кім ён столькі не камунікаваў, як і не наведваў сёлета іншых краінаў.
Больш за тое, не адбыліся сёлета і візіты Лукашэнкі ў Кітай і КНДР, якія, з ягоных словаў, меліся адбыцца яшчэ ў студзені.
Якуб Хруст belsat.eu
