Напярэдадні Радаўніцы, збіраючыся на могілкі, людзі нярэдка аддаюць перавагу штучным кветкам. Бо яны, маўляў, таннейшыя за жывыя і больш даўгавечныя.
«У хрысціянскай культуры гаворка пра жывыя кветкі, якія прыносяцца для пахавання. Тут асаблівае значэнне мае іх водар, колер і розны відавы склад. І не варта такі прыгожы сімвал як кветкі ператвараць у бяздушную рытуальную масу», – кажа Дзмітрый Лобан, клірык парафіі святыні Блажэннай Матроны Маскоўскай.
Супраць і эколагі. Бо кожная штучная кветка мае ў сваім складзе розныя віды пластыку, у тым ліку пенапласт, латэкс, поліэстэр.
,,«Пад уздзеяннем сонца, змены тэмператураў, дажджу ўсё роўна гэтыя вырабы раскладаюцца ў зямлі. Змываецца гэтая таксічная фарба. Раскладаецца ўсё гэта на мікрапластык і трапляе ў глебу, ваду, паветра», – тлумачыць Ягор, аператар «Зялёнага тэлефона».
Штогод на смеццевыя палігоны вывозяць каля мільёна старых пластыкавых кветак. Некаторыя прадпрыемствы ў краіне спрабуюць іх перапрацоўваць.
«У Полацку, наколькі мне вядома, наладжвалі ручны разбор гэтых кветак, а ў Горадні на мясцовым заводзе для перапрацоўвання адкідаў выкарыстоўваюць шрэдар, каб рэзаць гэтыя вырабы», – расказвае Ягор.
Аднак у межах краіны гэтага мала. Таму адзінае выйсце, як зазначае эксперт, – забараніць штучныя кветкі. Пакуль жа чыноўнікі робяць шэраг захадаў, каб вытворчасць і імпарт такіх кветак былі эканамічна нявыгадныя.
«Раней у вытворцаў і дастаўцаў штучных кветак не было абавязку арганізоўваць збор адкідаў, у якія ператвараюцца іхныя тавары. Цяпер гэты пералік пашыраны, туды ўключаны гэты від тавару», – тлумачыла Вольга Сазонава, прадстаўніца Міністэрства прыродных рэсурсаў і навакольнага асяроддзя.
Збіраючыся на магілы продкаў, варта аддаць перавагу ўсё ж жывым кветкам. Як найбольш практычны варыянт эколагі раяць высадзіць на месцы пахавання шматгадовыя расліны.
Ірына Юр'ева belsat.eu
