Прэзідэнт Расеі Уладзімір Пуцін абвясціў поўнае прыпыненне баявых дзеянняў з 8 да 10 траўня ўключна. Пра гэта паведамляе тэлеграм-канал Крамля 28 красавіка.
«Пастановаю вярхоўнага галоўнакамандуючага Узброенымі Сіламі Расейскай Федэрацыі Уладзіміра Пуціна, зыходзячы з гуманітарных меркаванняў, у дні 80-гадовай гадавіны Перамогі – з нуля гадзінаў з 7 на 8 траўня да нуля гадзінаў з 10 на 11 траўня – расейскі бок абвяшчае замірэнне. На гэты перыяд спыняюцца ўсе баявыя дзеянні», – гаворыцца ў паведамленні.
Адзначаецца, што Расея мяркуе, што «ўкраінскі бок мусіць пераняць гэты ўзор». Калі гэтага не здарыцца, Крэмль абяцае «адэкватны і эфектыўны адказ».
Заяўляецца, што расейскі бок нібыта гатовы да «мірных перамоваў без папярэдніх умоваў, накіраваных на ліквідацыю першапрычынаў украінскага крызісу, канструктыўнага ўзаемадзеяння з міжнароднымі партнёрамі».
Ад прэс-службы прэзідэнта Украіны Уладзіміра Зяленскага адказу яшчэ не было.
Мінулым разам Уладзімір Пуцін выступіў ініцыятарам замірэння на Вялікдзень 20 красавіка. Аднак фактычна яго не было – абстрэлы па Украіне працягваліся. Паводле Уладзіміра Зяленскага, колькасць парушэнняў расейскім войскам абяцання цішыні склала 2935. А ўкраінскія вайскоўцы паведамлялі, што на зямлі расейскія войскі выкарыстоўваюць замірэнне, каб расчысціць дарогу для будучых наступаў.
Таксама Мінабароны Расеі абвінаваціла Украіну ў тым, што гэта тая зрывала велікоднае замірэнне.
Арсен Рудэнка belsat.eu
