Расейскі нацыяналістычны мотаклуб «Начныя ваўкі» распачаў свой так званы «тур перамогі» – штогадовую прапагандысцкую паездку ў Берлін.
У суботу, 26 красавіка, байкеры выехалі з Масквы і маюць намер адзначыць 9 траўня каля Савецкага мемарыяла ў Трэптаў-парку, паведамляе BILD.
,,«Гэта будзе сімвалізаваць не толькі перамогу над фашызмам, але і вечныя каштоўнасці мірнага суіснавання і дружбы народаў», – заявілі ўдзельнікі мотаклуба.
Пакуль незразумела, ці змогуць яны праехаць на тэрыторыю Еўразвязу: і сам клуб, і шэраг яго ўдзельнікаў знаходзяцца пад санкцыямі.
На думку рэдакцыі BILD, у Нямеччыне ім, прынамсі, не будуць радыя. Яшчэ на мінулым тыдні, падчас мерапрыемстваў памяці Другой сусветнай вайны ў Торгау, байкеры ўжо выступалі як рэтранслятары крамлёўскай прапаганды, падмануўшы службы бяспекі.
У той жа час поўнасцю выключыць з’яўленне «Начных ваўкоў» у Берліне немагчыма: у клубе ёсць члены, якія пражываюць у самой Нямеччыне.
26 красавіка падчас выезду з Масквы байкеры разгарнулі сцягі свайго клубу, а таксама расейскія і нямецкія сцягі. На некаторых матацыклах заўважылі знак «Z», які ў Нямеччыне забаронены як сімвал расейскай агрэсіі супраць Украіны. Для выезду вялікіх калон удзельнікаў клубу ў Маскве перакрывалі вуліцы.
Падобныя акцыі пуцінскія байкеры ладзяць, пачынаючы з 2015 года. Пасля таго, як у 2022 годзе ўдзельнікаў клубу ўнеслі ў санкцыйныя спісы, у туры сталі ўдзельнічаць тыя з іх, у каго ёсць еўрапейскія пашпарты.
«Начныя ваўкі» з’яўляюцца паслядоўнымі прыхільнікамі палітыкі Уладзіміра Пуціна і вайны, якую ён развязаў ва Украіне. У 2014 годзе яны разам з кіраўніком РФ праехаліся па акупаваным Крыме.
Раман Шавель belsat.eu
