Святлана Ціханоўская лічыць, што запланаваныя напады на беларусаў у Літве сведчаць пра страх, які адчуваюць расейскі і беларускі рэжымы.
23 красавіка Дэпартамент дзяржаўнай бяспекі Літвы паведаміў, што расейскія і беларускія спецслужбы арганізоўваюць напады на беларусаў, якія жывуць у Літве.
,,«Той факт, што расейскія і лукашэнкаўскія спецслужбы спрабуюць пераследаваць беларусаў нават за межамі Беларусі, яшчэ раз даказвае, наколькі яны баяцца нашай салідарнасці і нашай працы», – перадае LRT заяву Святланы Ціханоўскай, зробленую ў інтэрв’ю агенцтву BNS пасля цырымоніі ў памяць пра ахвяр катастрофы на Чарнобыльскай АЭС.
Паводле яе, галоўная мэта такіх дзеянняў – запалохаць беларускую дыяспару, пасеяць страх і недавер паміж беларусамі і літоўцамі.
Але гэта не спрацуе, падкрэсліла Ціханоўская, бо Беларусь і Літва – суседзі і хаўруснікі, аб’яднаныя барацьбой за свабоду.
Дзяячка заклікала жыхароў Літвы падтрымліваць беларусаў, якія знайшлі тут прытулак, і аддзяляць беларускі народ ад рэжыму Аляксандра Лукашэнкі.
Святлана Ціханоўская адзначыла, што ўсведамляе магчымыя пагрозы, не ігнаруе іх, але давярае літоўскім службам.
,,«Мы разумеем, што пагрозы рэальныя, і не ігнаруем іх. Аднак нас не запалохаць. Мы ўпэўненыя, што літоўскія службы бяспекі робяць усё магчымае, каб абараніць беларусаў, а таксама выкрываць і спыняць любыя правакацыі з боку спецслужбаў рэжыму», – сказала яна ў інтэрв’ю.
Са словаў Ціханоўскай, цяпер ніводзін беларус не можа адчуваць сябе цалкам у бяспецы, таму прымаюцца дадатковыя захады.
«Мы працуем над выяўленнем агентаў рэжыму, інфармуем актывістаў дыяспары пра магчымыя пагрозы і рызыкі, а таксама пра тое, як правяраць інфармацыю і кантакты», – растлумачыла Ціханоўская.
Яна дадала, што ў Літве і Польшчы працуюць цэнтры, якія даюць юрыдычныя і псіхалагічныя кансультацыі.
Нагадаем, што Дэпартамент дзяржаўнай бяспекі (ДДБ) Літвы заявіў, што з 2023 года беларускія і расейскія спецслужбы вядуць актыўную інфармацыйна-псіхалагічную аперацыю супраць беларускай дыяспары і літоўскага грамадства. Мэта – распаліць этнічную напружанасць, сфармаваць вобраз Літвы як ксенафобскай дзяржавы і стварыць пагрозу для беларусаў, якія знайшлі там прытулак.
Паводле ДДБ, у Літве праходзіць арганізаваная аперацыя, якая імітуе канфлікт паміж дзвюма сіламі: ліцвіністамі (нібыта прыхільнікамі ідэі беларускай Вялікай Літвы) і літоўскімі нацыяналістамі, якія з імі змагаюцца. Мэтанакіравана ствараюцца падставы для гвалту: распаўсюджваюцца пагрозлівыя пасланні, надпісы «Вільня – наша!», б'юцца шыбы ў крамах і ўстановах, што належаць беларусам, фіксуюцца акты вандалізму і прапагандысцкія графіці тыпу «Ціханоўская, знікні з гораду».
Раман Шавель belsat.eu
