Лукашэнка фактычна абвінаваціў беларусаў у тым, што ўзнікла неабходнасць у працоўных мігрантах, а амбасадар нашай краіны ў Пакістане паведаміў пра супрацу з Ісламабадам у справе прыцягнення пакістанскіх работнікаў у Беларусь. Аналітык Вадзім Мажэйка ў каментары «Белсату» назваў самога Лукашэнку прычынаю недахопу працоўных рук, а словы палітыка пра беларусаў – зневажальнымі.
25 красавіка Аляксандр Лукашэнка падрабязна выказаўся пра працоўную міграцыю агулам і пакістанскіх работнікаў у прыватнасці. Палітык фактычна абвінаваціў беларусаў у неабходнасці клікаць у краіну працаўнікоў з-за мяжы. Маўляў, і прадукцыйнасць працы ў нас нізкая, і нараджаюць замала, а іначай і не давялося б запрашаць іншаземцаў.
Надоечы дзяржаўнае агенцтва БелТА апублікавала інтэрв'ю з амбасадарам Беларусі ў Пакістане Андрэем Мяцеліцай, які заявіў, што «пакістанскія адмыслоўцы» могуць закрыць «шэраг вакансіяў у розных прафесіях»:
«У цяперашні час разам з пакістанскім бокам выпрацоўваецца механізм узаемадзеяння, што будзе ўлічваць інтарэсы дзвюх дзяржаваў, наймальнікаў і работнікаў».
Палітычны аналітык Вадзім Мажэйка ў размове з «Белсатам» канстатаваў, што анансаваны прыезд 100–150 тысячаў пакістанцаў усхваляваў грамадства, і ўлады цяпер спрабуюць «патушыць пажар». Аднак тут важна не тое, што кажа Лукашэнка, а рэальныя дзеянні і механізмы дзеля інтэграцыі замежнікаў:
«Але ў любым выпадку гэта, вядома, заўжды будзе напружанасцю, як гэта ёсць напружанасцю ў любых краінах. А ў Беларусі абсалютна няма такога досведу. І тут маецца рызыка падысці да тэмы шапказакідальніцкі, так бы мовіць».
Пры гэтым з рыторыкі палітыка можна зрабіць выснову, што ўся «інтэграцыя» пакістанцаў і «супакойванне» беларускага грамадства звядзецца да ўлюбёнага спосабу ўладаў:
,,«Стаўка на сілавыя метады, што тыпова для рэжыму Лукашэнкі: гэта і рэпрэсіі ў дачыненні тых, хто ў TikTok каментаваў гэтую тэму, гэта пагрозы чыноўнікам, што яны нясуць персанальную крымінальную адказнасць за працоўных мігрантаў, якія там недзе на іхнай тэрыторыі працуюць, гэта пагроза мігрантам, што за любое парушэнне іх усіх будуць адразу дэпартаваць».
Мажэйка ўпэўнены, што стаўка толькі на сілу ў гэтым пытанні не спрацуе, патрабуецца комплекс розных захадаў.
Лукашэнку ўжо некалькі разоў давялося апраўдвацца за запрашэнне пакістанцаў у Беларусь, аднак ён не згадаў яшчэ адну прычыну дэфіцыту кадраў, акрамя старэння насельніцтва. Ідзецца пра дзве хвалі эміграцыі: пасля выбараў 2020 года і пачатку вайны ва Украіне, у якой нашая краіна выступіла ў ролі суагрэсара. Калі паслухаць палітыка, беларусы выехалі нібыта проста так.
«Збеглыя нам ужо не дапамогуць. Яны што, пойдуць у сельскую гаспадарку? Ды не, яны там стогнуць, ім прапанавалі посуд мыць – посуд мыць не можам: алергія на рукі. Дык а чаго ты туды паехала тады? Чаго ты туды паехала, калі ты ведала, што ты алергенная асоба?» – сказаў Лукашэнка на нарадзе.
Адказ на гэтае пытанне даў суразмоўца «Белсату»: менавіта Лукашэнка і стаўся прычынаю таго, што беларусы ўцякаюць з краіны.
«Сотні тысячаў, калі не мільён, акурат самых актыўных, працаздольных беларусаў выехалі за апошнія гады праз палітычныя рашэнні Лукашэнкі. Праблема не ў тым, што, напрыклад, Польшча стварыла нейкую суперпраграму для беларусаў. Праблема не ў тым, што нейкая, не ведаю, навала вакол Беларусі. Сам Лукашэнка праблему стварыў. Дваццаты год, а потым дваццаць другі – суўдзел у вайне. Сваімі дзеяннямі Лукашэнка сам штурхае беларусаў да ад'езду».
Вяртанню беларусаў і хаця б частковаму развязанню праблемы недахопу працоўных рук паспрыяла б грамадскае замірэнне, кажа Мажэйка. Аднак палітык на гэта не ідзе, бо клапоціцца толькі пра сваю ўладу:
«Мы бачым з боку Лукашэнкі абсалютна зневажальную рыторыку пра беларусаў, ён кажа, што людзі не тыя, што нараджаць не хочам і працуем „з халадком“. Так, яму прыемней было б кіраваць пакістанскімі працоўнымі мігрантамі. І гэта, канечне, абсалютна зневажальна, бо Лукашэнка проста думае пра свае інтарэсы. Людзі не любяць, калі іх ігнаруюць ва ўласнай краіне».
У развагах пра міграцыю людзей Лукашэнка зазначыў, што асоба проста так перасяляцца ў іншую краіну не будзе, «гэта ўжо гора прымусіла».
«Вось цікавая рэч: ён чамусьці гэта разумее пра пакістанцаў, – падкрэслівае Мажэйка. – А чаму беларусы неяк сталі перасяляцца ў іншыя краіны, якое ж такое гора нас прымусіла гэта рабіць? І хто гэтае гора стварыў? Да пакістанцаў чамусьці ён можа гэта ўжыць, а адносна беларусаў чамусьці не разумее. Лічыць, што беларусы самыя кепскія, не хочуць нараджаць і з'язджаюць у Польшчу. Тут, вядома ж, абсалютная крывадушнасць».
Аналітык звярнуў увагу, што такое стаўленне «высокага начальства» да беларусаў, якіх паставілі перад фактам запрашэння пакістанцаў, дазваляе лёгка падбухторваць грамадства:
,,«Лукашэнка тут настолькі далёка ад чаканняў грамадства і настолькі зняважліва ставіцца да беларусаў, што гэтая гісторыя можа быць чыннікам падбухторвання грамадскіх настрояў супраць такой улады, якая не хоча ствараць умовы для беларусаў, а хоча толькі завозіць мігрантаў».
У сувязі з планамі ўладаў Мажэйка асцерагаецца ўсплёску нацыяналізму:
«Праблема не ўласна ў эміграцыі. І праблема не ў тым, якія пакістанцы ці якая ў іх рэлігія. Мы ўжо бачым такія каментары, што, маўляў, вось панаедуць нейкія мусульмане, яны там усе нейкія дзікуны. Гэта вельмі небяспечная рыторыка. Вельмі важна, каб у нас не было ніякіх усплёскаў нацыяналізму праз гэта. Трэба разумець, што корань праблемы – не ў пакістанцах, а ў Лукашэнку і ў ягонай палітыцы», – падсумаваў суразмоўца «Белсату».
Сцяпан Кубік belsat.eu
