Суд гораду Брэда прызначыў 58-гадоваму беларусу 12 гадоў турэмнага зняволення за забойства 25-гадовага калегі на аўтастаянцы Газэлдонк-Ост недалёка ад мяжы з Бельгіяй.
Абодва былі беларускімі кіроўцамі і працавалі ў літоўскай транспартавай кампаніі «Finejas». Яны правялі разам увесь дзень 21 кастрычніка 2023 года.
У той жа вечар забітага маладога мужчыну знайшлі на зялёнай паласе побач з цяжкавіком, без абутку, што навяло следства на думку, што той быў у кабіне машыны. Ён атрымаў пяць нажавых раненняў і адно рэзанае, два з якіх аказаліся смяротнымі, піша мясцовае выданне Breda Vandaag.
Паліцыя дапытала ўсіх кіроўцаў цяжкавікоў на паркоўцы і тых, якія з’ехалі, а таксама сабрала запісы з камераў. Праз тры тыдні знайшлі 57-гадовага мужчыну, таксама беларуса. Яго ідэнтыфікавалі як падазраванага і арыштавалі 13 лістапада. Пасля ў салоне ягонага цяжкавіка знайшлі сляды ахвяры, у тым ліку кроў на фіранцы з боку пасажыра. ДНК падазраванага таксама знайшлі на кашулі ахвяры.
Суд высветліў, што пацярпелы сеў у цяжкавік да падазраванага пасля відэазванка з сямейнікам. Пасля ён, атрымаўшы траўму, выйшаў з кабіны і, прайшоўшы некалькі метраў, страціў прытомнасць. Хлопца знайшоў іншы кіроўца і выклікаў дапамогу, але той памёр, не дачакаўшыся яе.
Падазраваны адмаўляў абвінавачанні. Маўляў, пасля апошняга моманту на здымках з камераў ён не бачыў ахвяры. Аднак ягоныя заявы пра падзеі былі непаслядоўныя і часткова відавочна няслушныя, заявіў суд. Напрыклад, падазраваны сцвярджаў, што ўвесь час спаў, але запісы з камераў сведчылі пра адваротнае.
Паводле суда, на наступны дзень пасля інцыдэнту падазраваны таксама быў прыкметна неспакойны і ведаў, што на паркоўцы праводзіцца паліцэйскае расследаванне. Больш за тое, у размовах з менеджарам ён апавёў пра інцыдэнт з нажом, але гэтай інфармацыі не падалі паліцыі.
Цяжкавік, у якім абвінавачаны працаваў да і пасля злачынства, быў сканфіскаваны і больш за паўтара года не выкарыстоўваўся. Тым часам у ахвяры засталіся жонка і двое малых дзяцей, ён адзін забяспечваў сямʼю.
«У яго яшчэ было ўсё жыццё наперадзе, але падазраваны яго адабраў», – заявіў суд.
Нягледзячы на станоўчыя водгукі пра характар падазраванага, суд пастанавіў, што яму не можа быць прызначанае нічога, акрамя турэмнага зняволення тэрмінам на 12 гадоў.
Тэса Анэйда belsat.eu
