Албанія не была надта папулярным кірункам для беларускіх турыстаў, нягледзячы на бязвіз. Але ў беларусаў і так невялікі выбар краінаў, якія прымуць без візы.
Афіцыйнае Тэлеграфнае агенцтва Албаніі паведаміла 24 красавіка аб прыпыненні дзеяння пагаднення з Беларуссю пра ўзаемнае скасаванне візаў. Пастанова набыла моц. Да таго беларусы маглі заставацца ў Албаніі без візы не больш за 30 дзён з даты ўезду і сумарна не больш за 90 дзён за каляндарны год.
Паведамляецца, што ўрад ухваліў такую пастанову, падтрымаўшы Закон аб міжнародных пагадненнях у Албаніі на прапанову міністра Еўропы і замежных справаў. Што гэта значыць, не раскрываюць.
Албанія можа пахваліцца ўнікальнымі культурай і мовай, пляжамі на Адрыятычным і Іянічным марах, адносна нізкімі цэнамі. Ды беларусы адпачывалі ў Албаніі нячаста: паводле Белстату, у 2024 годзе краіну наведалі толькі 67 арганізаваных турыстаў (PDF). На момант публікацыі на папулярным агрэгатары тураў з 51 090 прапановаў толькі 4 былі ў Албанію.
Гэта можа быць звязана з санкцыямі і закрыццём неба для «Белавіі»: у 2019 годзе ў Албанію ездзілі 3985 арганізаваных турыстаў (PDF). Але і тое было няшмат: у тым жа 2019-м 48 тысячаў арганізаваных турыстаў наведалі Балгарыю, больш за 33 тысячы – Іспанію, больш за 258 тысячаў – Егіпет, больш за 155 тысячаў – Турэччыну. Да ковіду, санкцыяў і захопу самалёта «Ryanair» з Албаніяй спаборнічала далёкая Куба.
Ды кожная страта бязвізу для беларусаў адчувальная. Грамадзяне Беларусі могуць трапіць без візы толькі ў 42 краіны (калі не лічыць Украіны, мяжа з якою закрытая, а таксама Гон-Конгу і Макаў у складзе Кітаю). Паводле «бязвізавай моцы» беларускі пашпарт цяпер на 50-м месцы ў свеце ў рэйтынгу «Passport Index».
З Албаніяй суседнічае ўсё яшчэ бязвізавая Чарнагорыя, але беларускія турыстычныя аператары прапануюць ляцець туды з Варшавы ці Вільні – а значыць, атрымліваць шэнгенскую візу.
Алесь Наваборскі belsat.eu
