У Польшчы расследуюць знікненне спікеркі Каардынацыйнай рады Беларусі Анжалікі Мельнікавай. Следства вядуць на падставе артыкулу пра незаконнае пазбаўленне волі.
Кіраўнік Народнага антыкрызіснага ўпраўлення, сябра Каардынацыйнай рады і Аб’яднанага пераходнага кабінету Павел Латушка паведаміў 24 красавіка, што атрымаў звесткі пра расследаванне ў Польшчы знікнення спікеркі КР Анжалікі Мельнікавай.
Камендант сталічнай паліцыі ў адказ на зварот праінфармаваў, што справу Мельнікавай, у якой яна праходзіць як пацярпелая асоба, перадалі ў пракуратуру. Матэрыялы, звязаныя з пагрозамі іншым работнікам НАУ ад уладаў Беларусі, перададзеныя адпаведнай службе.
Люблінскі аддзел Дэпартаменту барацьбы з арганізаванаю злачыннасцю і карупцыяй Нацыянальнай пракуратуры Польшчы праінфармаваў Латушку адмысловым лістом, што пастановаю пракурора за 16 красавіка распачатае следства ў справе пазбаўлення волі ў дачыненні Анжалікі Мельнікавай на падставе артыкулу 189 § 1 («Незаконнае пазбаўленне волі») Крымінальнага кодэксу Польшчы ды іншых артыкулаў. Мельнікаву разглядаюць у якасці пацярпелай.
***
Раней польская пракуратура паведаміла «Белсату», што не дае згоды на разгалошванне справы Мельнікавай на гэтым этапе следства.
Паводле польскіх праваахоўнікаў і паплечнікаў, Анжаліка Мельнікава пакінула тэрыторыю Польшчы і Еўразвязу 26 лютага, паляцела ў Лондан, выходзіла на сувязь з невядомых месцаў і канчаткова знікла 25 сакавіка. Перад гэтым ейны тэлефон выкарыстоўвалі для доступу да файлаў Каардынацыйнай рады з беларускага IP-адрасу – верагодна, але не гарантавана, што тэлефон быў на тэрыторыі Беларусі. Кіраўнік ініцыятывы «BY_help» Аляксей Лявончык, які займаецца пошукамі Мельнікавай у Аб'яднаным Каралеўстве, кажа, што яна дакладна пакінула Лондан.
Алесь Наваборскі belsat.eu
