Знікненне спікеркі КР Анжалікі Мельнікавай расследуе Дэпартамент у справе арганізаванай злачыннасці і карупцыі Нацыянальнай пракуратуры Польшчы. У ведамстве заявілі «Белсату», што на гэтым этапе следства аніякіх падрабязнасцяў раскрываць не будуць.
Расследуе знікненне спікеркі Каардынацыйнай рады Анжалікі Мельнікавай Люблінскі аддзел Дэпартаменту ў справах арганізаванай злачыннасці і карупцыі. Гэта структурная адзінка Нацыянальнай пракуратуры Польшчы.
Як паведамляў «Белсат», 16 красавіка завялі крымінальную справу паводле факту знікнення грамадзянкі Беларусі і Польшчы. На пытанне нашага карэспандэнта, на якім этапе цяпер следства і ці вызначаная галоўная версія, прадстаўніца Нацыянальнай пракуратуры Катажына Цалеў-Яшэўска паўтарыла, што справу даручылі Агенцтву ўнутранай бяспекі і разглядаецца ў тым ліку выкраданне:
,,«Пачатае расследаванне, у прыватнасці, паводле артыкулу „Незаконнае пазбаўленне волі“. Справу даручылі Агенцтву ўнутранай бяспекі з мэтаю высветліць акалічнасці, што могуць быць звязаныя са знікненнем пацярпелай. На гэтым этапе разбору пракурор, які вядзе справу, не дае згоды на разгалошванне далейшай інфармацыі».
Мельнікава пакінула Польшчу і Еўразвяз 26 лютага 2025 года, яна не выходзіла на сувязь з 25 сакавіка. Паводле сузаснавальніка «BY_Help» і «BYSOL» Аляксея Лявончыка, спікерка «стоадсоткава» прылятала ў Лондан, аднак надоўга там не затрымалася і паляцела далей. Інфармацыі пра далейшы маршрут Мельнікавай ён пакуль не дае.
Паводле Андрэя Мельнікава (ці то былога мужа Анжалікі, ці то існага), ён разам з дзецьмі цяпер у Беларусі.
Дар'я Форман, Сцяпан Кубік belsat.eu
