Грамадзяне Беларусі і Расеі, якія будуць уязджаць у Латвію з краінаў Шэнгенскай зоны, хутка павінны будуць абавязкова запаўняць адмысловую заяву пра сваё месца прабывання ў краіне. Пра гэта паведаміў міністр унутраных справаў Латвіі Рыхардс Казлоўскіс у тэлеэфіры.
Міністэрства ўнутраных справаў Латвіі ўжо распрацоўвае палажэнне, што павінна дапамагчы ўладам сачыць за грамадзянамі Беларусі і Расеі, якія перамяшчаюцца ў межах Шэнгенскай прасторы.
«Уяжджаючы праз Шэнгенскую зону, грамадзяне Расеі і Беларусі будуць абавязаныя запоўніць заяву пра сваё месца прабывання ў Латвіі», – цытуе міністра ўнутраных справаў Латвіі Рыхардса Казлоўскіса Lsm.lv.
Як адзначыў Казлоўскіс, у 2024 годзе колькасць шэнгенскіх візаў, выдадзеных грамадзянам Расеі, вырасла ў параўнанні з 2023-м. Пры гэтым асноўную частку візаў выдаюць некалькі краінаў ЕЗ, што, на думку ўладаў, стварае рызыкі ўнутранай бяспецы.
«Свабоднае перамяшчэнне расейскіх турыстаў у Шэнгене – гэта патэнцыйная пагроза», – падкрэсліў міністр.
Пасля ўступлення ў моц новых правілаў, кожны беларус або расеец, які прыбывае ў Латвію з іншай краіны Шэнгену, будзе вымушаны афіцыйна паведаміць пра свой прыезд праз адмысловую форму. Гэта асабліва важна для тых, хто мае візу іншай дзяржавы ЕЗ, але мінае мяжу Латвіі.
У лютым 2025 года МЗС Латвіі ўжо заяўляла пра намер дадаткова правяраць грамадзянаў Беларусі і Расеі, якія падаюць заяўкі на візы ці дазвол на жыхарства. Мэта – не дапусціць уезду асобаў, чый візіт можа пагражаць нацыянальнай бяспецы або грамадскаму парадку.
Палажэнне яшчэ мусіць быць зацверджанае Сеймам Латвіі. Калі яно набудзе моц, кожны беларус, які прыедзе ў краіну нават з візай іншай дзяржавы Шэнгену, мусіць будзе паведамляць пра свой статус. Латвія паказвае: у геапалітычных умовах вайны і пагрозаў пільнасць перамагае звыклыя правілы свабоды перамяшчэння.
Надзея Вольная belsat.eu
