Нацбанк вызначыў курсы валютаў на 23 красавіка: долар будзе каштаваць 3,0251 рубля. «Белсат» спытаў эканамістку Настассю Лузгіну, чаму амерыканская валюта таннее.
Долар абнавіў двухгадовы мінімум. 23 красавіка за амерыканскую валюту, паводле курсу Нацбанку, будуць даваць 3,0251 рубля. Летась самы нізкі курс долара склаў 3,0916 рубля, а пазалетась ён наагул падаў да 2,6055 рубля.
Эканамістка даследчага цэнтру BEROC Настасся Лузгіна ў каментары «Белсату» растлумачыла, чаму долар цяпер таннее. Зноў вінаваты прэзідэнт ЗША Доналд Трамп, ён накінуўся на кіраўніка Федэральнай рэзервовай сістэмы (ФРС), што выконвае ў Злучаных Штатах функцыі рэгулятара.
,,«З доларам усё зразумела: апошнія заявы Трампа знізілі прывабнасць долара. [Трамп] раскрытыкаваў палітыку старшыні ФРС. Аднак гэта такі кароткатэрміновы чыннік, што наклаўся на іншыя. Інвестары турбуюцца, не жадаюць укладацца ў долар».
Агулам жа, як нагадала экспертка, беларускі рубель ідзе тым жа кірункам, што і расейскі. Гэта тлумачыцца крытычнай залежнасцю нашай краіны ад эканомікі ўсходняй суседкі.
Расейскі рубель цяпер умацоўваецца дзякуючы продажу валюты тамтэйшым Цэнтрабанкам і экспарцёрамі.
Што далей будзе з доларам у Беларусі, прадказаць цяжка, бо гэта залежыць ад шмат якіх чыннікаў. Для прагнозаў трэба, напрыклад, залезці ў галаву Трампа, а таксама ведаць, якой будзе цана на нафту.
Баданне Трампа з ФРС
Трамп упэўнены, што цяпер той самы момант, каб зніжаць адсоткавыя стаўкі і, адпаведна, рабіць крэдыты больш таннымі. Нагадвае дзеянні ўладаў Беларусі, якія таксама намагаюцца раздаць грошы прадпрыемствам з надзеяй стымуляваць эканамічны рост.
Пры гэтым Трамп не падбірае выразаў: ён назваў кіраўніка ФРС Джэроўма Паўэла «галоўным лузэрам».
«Шмат хто заклікае да "прэвентыўнага зніжэння" адсоткавых ставак. Інфляцыі практычна няма, але можа адбыцца запавольванне эканомікі, калі толькі містар Занадта-Позна, галоўны лузэр, не знізіць адсоткавых ставак проста зараз. Еўропа ўжо зніжала сем разоў», – напісаў прэзідэнт ЗША ў сваёй сацсетцы «Truth Social».
На мінулым тыдні Трамп таксама заклікаў да зніжэння ставак і заявіў, што адстаўка Паўэла «мусіць адбыцца як мага хутчэй».
Федэральная рэзервовая сістэма супраціўляецца, бо бачыць пагрозы ў цяперашняй эканамічнай палітыцы Белага дому. Як казаў Паўэл, тарыфная вайна, развязаная Трампам, можа прывесці да росту цэнаў і беспрацоўя, таму спяшацца са стаўкамі не варта, а трэба пачакаць вынікаў працы амерыканскай эканомікі ў першым квартале і глядзець, што будзе далей.
Сцяпан Кубік belsat.eu
