У Ватыкане з’явілася першае афіцыйнае фота Папы Францішка пасля смерці – на ім 88-гадовы пантыфік ляжыць у адкрытай простай драўлянай труне. Побач з целам – швейцарскія гвардзейцы і найвышэйшыя прадстаўнікі духавенства, паведамляе прэс-служба Ватыканскага сабору.
«Усё ягонае жыццё было прысвечанае служэнню Госпаду і Яго Царкве», – адзначана ў заяве кардынала Кевіна Фэрэла.
Паводле волі самога Папы, пахаванне пройдзе не ў саборы Святога Пятра, а ў базіліцы Санта-Марыя-Маджорэ – менавіта туды Францішак хадзіў маліцца перад і пасля кожнай сваёй замежнай паездкі. Там жа, у простай грабніцы з надпісам «Franciscus», ён будзе спачываць.
Цела Папы тры дні будзе выстаўленае для публічнага развітання ў саборы Святога Пятра, дзе кожны вернік будзе мець магчымасць аддаць апошнюю пашану пантыфіку.
У Рым чакаюць візіт сусветных лідараў, сярод якіх і Доналд Трамп, а таксама адмысловыя рэйсы з Аргенціны, радзімы Папы Францішка.
Нагадаем, Францішак стаўся першым пантыфікам з Лацінскай Амерыкі і адным з самых нязвыклых у гісторыі Каталіцкай Царквы – сціплы, прагрэсіўны і глыбока сацыяльна арыентаваны, ён кіраваў Ватыканам з 2013 года.
Надзея Вольная belsat.eu
