У панядзелак 21 красавіка загарэўся лес каля вёскі Старына ў Столінскім раёне Берасцейскай вобласці. Агонь хутка ахапіў вялікую плошчу, да ліквідацыі ўзгарання давялося падключаць авіяцыю, паведамляе МНС. Непадалёк знаходзіцца заказнік «Альманскія балоты».
Тушэнне ляснога пажару каля Старыны ўскладнена адсутнасцю пад’язных шляхоў і забалочанасцю мясцовасці. Для маніторынгу на месца ўзгарання адпраўлены верталёт Мі-2. Верталёты авіяцыі МНС Мі-8 і Мі-17 па стане на 18:00 па беларускім часе здзейснілі ўжо 22 скідвання (77 тон) вады. Задзейнічалі таксама Мі-26 – самы грузапад’ёмны верталёт у свеце – на ўзбраенні авіятараў беларускага МНС маецца адзін такі. За раз верталёт скідвае 15 тон вады.
Пажар каля Старыны небяспечны тым, што зусім блізка знаходзіцца заказнік «Альманскія балоты».
Таксама 21 красавіка падраздзяленні МНС ліквідуюць лясны пажар каля вёскі Кайкава ў Менскім раёне. На месцы ўзгарання працуюць 7 адзінак тэхнікі і 22 ратаўнікі МНС, а таксама 10 адзінак тэхнікі і 50 чалавек з Менскага лясгасу. Ліквідацыя пажару ўскладненая адсутнасцю пад’язных шляхоў і парывамі ветру.
За содні 20 – 21 красавіка ў Беларусі былі зліквідаваныя дзевяць лясных пажараў на агульнай плошчы 4,117 гектара. Таксама працаўнікі МНС выязджалі на 76 пажараў травы і хмызняку. Каля вёскі Малыя Сялюцічы ў Петрыкаўскім раёне тушылі тарфяны пажар. Для яго ліквідацыі была задзейнічаныя 14 адзінак тэхнікі і 43 асобы. Узгаранне было злакалізаванае, яго плошча складала 10 гектараў.
Паводле Міністэрства лясной гаспадаркі, на тэрыторыі Беларусі захоўваецца складаная пажаранебяспечная абстаноўка. За выходныя працаўнікі лясных гаспадарак ліквідавалі 26 лясных пажараў плошчай больш за 100 гектараў – у Бараўлянскім, Чачэрскім, Палескім, Мілашевіцкім, Петрыкаўскім лясгасах. Некаторыя з іх тушылі ў тым ліку ўначы.
Паводле экспертаў, на ўзнікненне пажараў уплываюць высокія тэмпературы паветра, адсутнасць дажджоў і перасыханне балотаў. Заснавальнік украінскага прыроднага цэнтру «Міжрэчанская пушча» Андрэй Сагайдак папярэджвае, што калі цяпер не будзе вялікіх дажджоў, лета будзе вельмі сухім. Гэта моцна паўплывае на сельскую гаспадарку. Могуць больш часта здарацца тарфяныя пажары.
З украінскім адмыслоўцам згодная прадстаўніца беларускай экалагічнай арганізацыі «Зялёная сетка» Ірына Панядзельнік – яна кажа, што сёлета ў Беларусі можна чакаць засуху, дэфіцыт ападкаў, што паўплывае на ўраджай асноўных сельскагаспадарчых культураў. Найбліжэйшыя 10 – 20 гадоў можна чакаць яшчэ больш экстрэмальных з’яваў надвор’я, як то засухаў і лясных пажараў.
Марыя Міхалевіч belsat.eu
