Прэзідэнт Расеі Уладзімір Пуцін не даваў каманды на прадаўжэнне велікоднага перамірʼя. Пра гэта піша ТАСС са спасылкаю на прэс-сакратара Крамля Дзмітрыя Пяскова.
«Іншых камандаў не было», – адказаў Дзмітрый Пяскоў на пытанне журналістаў, скончыцца перамірʼе ў ноч на 21 красавіка ці можа быць падоўжанае.
Раней Уладзімір Пуцін прапанаваў перамірʼе на Вялікдзень – з 18:00 19 красавіка да 00:00 21 красавіка.
Прэзідэнт Украіны Уладзімір Зяленскі пагадзіўся і прапанаваў працягнуць перамірʼе на 30 дзён, аднак ягоная прапанова не была прынятая. Акрамя таго, дамова пра перамірʼе фактычна была парушаная – Расея атакавала Украіну.
«З пачатку содняў і да 16:00 адбыліся 46 расейскіх штурмавых дзеянняў на розных кірунках і 901 абстрэл, і з гэтай колькасці 448 – менавіта з цяжкага ўзбраення. Зафіксаваныя ўжо больш за чатырыста ўжыванняў FPV [від дронаў. – Заўв. рэд.] расейцамі», – апавёў 20 красавіка Уладзімір Зяленскі.
Арсен Рудэнка
