«На ўсіх кірунках расейцы працягваюць весці агонь», – заявіў кіраўнік украінскага Цэнтру супрацьдзеяння дэзынфармацыі. Уладзімір Пуцін раней абвесціў, што велікоднае замірэнне пачнецца а 18-й гадзіне. Афіцыйна Кіеў не адказаў узаемнасцю, аднак крыніцы тэлерадыёкарпарацыі BBC сцвярджаюць, што ўкраінскія вайскоўцы атрымалі загад спыніць агонь.
Часовае спыненне агню мелася доўжыцца з 18:00 суботы да канца нядзелі. Уладзімір Пуцін, калі абвяшчаў велікоднае замірэнне, сказаў, што спадзяецца на ўзаемны крок украінскага боку.
Праз некалькі хвілінаў пасля таго, як агонь меўся спыніцца, кіраўнік украінскага Цэнтру супрацьдзеяння дэзынфармацыі Андрэй Каваленка напісаў у сваім Telegram-канале, што ніякага замірэння не адбылося:
,,«На ўсіх кірунках расейцы працягваюць весці агонь. Найбольш – на ўсходзе».
Ён таксама адзначыў, што мэта «пуцінскага замірэння» – абвінаваціць Украіну ў яго парушэнні:
«Расейцы спрабуюць выдаць сябе за „міратворцаў“, але яны ўжо адмовіліся ад безумоўнага спынення агню 11 сакавіка, а цяпер вядуць інфармацыйную аперацыю, кажуць пра „замірэнне“, але працягваюць страляць без упынку. Усё з мэтаю абвінаваціць Украіну».
За пяць хвілінаў да пачатку замірэння расейскія дроны атакавалі Херсон. Кіраўнік Офісу прэзідэнта Андрэй Ермак апублікаваў відэа з наступствамі абстрэлу: на кадрах – пажар у жылым шматпавярховіку.
Пры гэтым украінскі ваенкар Андрэй Цапліенка піша, што на некалькіх адцінках харкаўскага кірунку вайскоўцы пацвярджаюць спыненне агню, а вось у Данецкай вобласці «акупанты працягваюць біць».
Прэзідэнт Уладзімір Зяленскі назваў ініцыятыву Масквы «чарговаю спробаю Пуціна пагуляцца жыццямі людзей». А міністр замежных справаў Украіны Андрэй Сыбіга адзначыў, што варта сачыць не за словамі, а дзеяннямі:
«Пазіцыя Украіны застаецца выразнаю і паслядоўнаю: яшчэ 11 сакавіка мы безагаворачна пагадзіліся на прапанову ЗША наконт поўнага спынення агню на 30 дзён. Расея адмовілася, і расейская адмова Злучаным Штатам цягнецца ўжо 39 дзён. Цяпер Пуцін робіць заявы пра нібыта гатовасць да спынення агню. 30 гадзінаў замест 30 дзён. Мы ведаем, што ягоным словам нельга давяраць, і будзем глядзець на дзеянні, а не на словы».
Тым часам крыніца брытанскай тэлерадыёкарпарацыі BBC заявіла, што ўкраінскія вайскоўцы атрымалі загад спыніць агонь «праз некалькі хвілінаў» пасля таго, як мелася пачацца замірэнне, а таксама збіраць фота- і відэадоказы парушэнняў замірэння і пры неабходнасці адкрываць агонь у адказ.
Гісторык, палітычны аглядальнік Аляксандр Фрыдман у каментары «Белсату» казаў, што абвешчанае Пуціным велікоднае замірэнне – пасланне прэзідэнту ЗША Доналду Трампу:
«Яны працягваюць з Трампам заігрываць, дасылаюць яму рэверансы, бо не жадаюць парваць з Трампам. Яны зацікаўлены ў тым, каб выйграць час і, галоўнае для іх, – дасягнуць максімальна сваіх мэтаў ва Украіне і адначасова наладзіць добрыя стасункі з амерыканцамі».
Аналітык назваў часовае замірэнне «прапагандысцкім крокам, што амаль нічога не каштуе»:
«Мы ж ведаем, як Расея ставіцца да гэтых розных замірэнняў. Яны, безумоўна, абвінавацяць Украіну ў тым, што яна парушае, але пэўны прапагандысцкі эфект ад гэтага будзе, і добры фон для Пуціна таксама ў гэтым кантэксце будзе».
Сцяпан Кубік belsat.eu
