Уладзімір Пуцін заявіў, што загадаў часова спыніць баявыя дзеянні ва Украіне з нагоды Вялікадня. Палітык абгрунтаваў гэта «гуманітарнымі меркаваннямі». Аналітык Аляксандр Фрыдман у размове з «Белсатам» засумняваўся ў гуманізме кіраўніка расейскай дзяржавы і растлумачыў, чаму гэтае замірэнне было абвешчанае.
Замірэнне, пра якое абвесціў Уладзімір Пуцін, мае дзеяць з 18 гадзінаў суботы да апоўначы з нядзелі на панядзелак.
«Загадваю на гэты перыяд спыніць усе баявыя дзеянні. Зыходзім з таго, што ўкраінскі бок пяройме наш прыклад. Пры гэтым нашыя войскі мусяць быць гатовыя да адбівання імаверных парушэнняў замірэння і правакацыяў з боку праціўніка, любых яго агрэсіўных дзеянняў», – цытуе палітыка сайт Крамлю.
Пуцін таксама сказаў, што прапанаванае ім велікоднае замірэнне пакажа, наколькі шчыра ўкраінскія ўлады хочуць мірных перамоваў і ці здольны Кіеў выконваць дамоўленасці.
Палітык запэўніў, што ў Маскве да такіх перамоваў «заўсёды былі гатовыя».
Гісторык, палітычны аглядальнік Аляксандр Фрыдман у сваім Telegram-канале напісаў, што гэтае часовае замірэнне – «вымушаны рэверанс у бок Доналда Трампа на фоне пагрозаў ЗША выйсці з перамоўнага працэсу»:
«Насамрэч жа гэта чарговая спроба запудрыць мазгі амерыканцам, выйграць час і адтэрмінаваць паўнавартаснае спыненне баявых дзеянняў, якога дамагаецца Трамп».
Аналітык таксама зазначыў, што «Масква дасюль ухіляецца ад наўпроставага адказу на пытанне наконт спынення агню, а абвінавачванне Кіева ў зрыве „велікоднага замірэння“ – пытанне гадзінаў».
Напярэдадні дзяржсакратар ЗША Маркаў Руб’ёў прыгразіў, што калі бліжэйшым часам не ўдасца спыніць агонь ва Украіне, Вашынгтон проста «ўмые рукі» і не будзе браць удзелу ў мірных перамовах.
Гэта азначала б, што Злучаныя Штаты спынілі б дапамогу Украіне, і ў такім выпадку Расеі было б прасцей «дасягнуць мэтаў спецыяльнай ваеннай аперацыі». У каментары «Белсату» Фрыдман растлумачыў, чаму такая логіка не спрацуе і чаму велікоднае замірэнне – сапраўды «рэверанс Трампу»:
«Пуцін жа заўсёды жадаў, каб яго менавіта на Захадзе паважалі, каб да яго ставіліся як да роўнага. Зараз супраца з амерыканцамі за кошт Еўропы і за кошт Украіны – гэта было б для Расеі досыць цікавым. І калі зараз пасварыцца з Трампам, адкінуць ягоныя прапановы – гэта для Пуціна не самае лепшае. Зараз гэтыя магчымасці абсалютна ўнікальныя. Хто ж мог сабе ўявіць, што Расея выйдзе з той ізаляцыі на заходнім кірунку, на амерыканскім кірунку, што была».
Менавіта таму ў Маскве асцерагаюцца, што Трамп запсіхуе і страціць цікавасць да вайны:
,,«Яны працягваюць з Трампам заігрываць, дасылаюць яму рэверансы, бо не жадаюць парваць з Трампам. Яны зацікаўлены ў тым, каб выйграць час і, галоўнае для іх, – дасягнуць максімальна сваіх мэтаў ва Украіне і адначасова наладзіць добрыя стасункі з амерыканцамі».
Паводле эксперта, абвешчанае Пуціным велікоднае замірэнне – акурат такая прынада для Трампа. Пагатоў, часовае спыненне агню «амерыканцы могуць падаць як сваю перамогу»:
«Маўляў, вось глядзіце, мы ж чагосьці дасягнулі. Ну, не атрымалася поўнага спынення баявых дзеянняў дасягнуць да Вялікадня. Але вось мы прымусілі прынамсі пайсці Расею на гэты крок».
Фрыдман назваў часовае замірэнне «прапагандысцкім крокам, што амаль нічога не каштуе»:
«Мы ж ведаем, як Расея ставіцца да гэтых розных замірэнняў. Яны, безумоўна, абвінавацяць Украіну ў тым, што яна парушае, але пэўны прапагандысцкі эфект ад гэтага будзе, і добры фон для Пуціна таксама ў гэтым кантэксце будзе».
У «гуманітарныя меркаванні», якімі Пуцін абгрунтаваў спыненне агню, аналітык не верыць:
,,«Сённяшні расейскі рэжым нешта кажа пра гуманітарныя пытанні пасля ўдару па Крывым Розе, пасля ўдару па Сумам. Расея вядзе гэтую вайну такім чынам, што пра нейкі гуманітарны чыннік казаць не даводзіцца. Пра гуманітарныя прынцыпы кажуць людзі, якія гэтыя самыя гуманітарныя прынцыпы ніколі ўсур'ёз не ўспрымалі. Таму гэта відавочна палітычны разлік».
Фрыдман пры гэтым не выключыў, што Расея выкарыстае часовае замірэнне «дзеля жахлівай правакацыі»:
«Паглядзім, што будзе наступнымі наступнымі днямі. Ці гэта ўсё сапраўды будзе больш-менш замірэнне, альбо, і гэтага я б таксама не выключаў, што яны выкарыстаюць яго для новай сур'ёзнай і, магчыма, нават жахлівай правакацыі».
Ва Украіне пакуль дакладна не сказалі, ці будуць спыняць агонь. Прапанову з Масквы прэзідэнт Уладзімір Зяленскі назваў «чарговаю спробаю Пуціна пагуляцца жыццямі людзей»:
,,«Зараз па тэрыторыі Украіны шырыцца паветраная трывога. У 17:15 у нашым небе зафіксаваныя расейскія ўдарныя дроны. Украінская СПА і авіяцыя ўжо пачалі працаваць на абарону. „Шагэды“ ў нашым небе – гэта сапраўднае стаўленне Пуціна да Вялікадня і да жыццяў людзей».
Сцяпан Кубік belsat.eu
