Беларус, які ўчыніў дэбош з некалькімі ДТЗ у Варшаве, цяпер у шпіталі. Сваіх паводзінаў ён не растлумачыў. Пра гэта паведаміла «Белсату» прэс-сакратарка крымінальнага аддзелу раённай паліцыі Варшавы VI Паўліна Анышка.
«Грамадзянін Беларусі цяпер перабывае ў медычнай установе. Як доўга ён будзе заставацца пад наглядам спецыялістаў, залежыць выключна ад пастановы доктара», – кажа Паўліна Анышка.
Калі адбылося здарэнне, польскія СМІ пісалі, што беларус пад уздзеяннем наркотыкаў бегаў голы па дарогах Варшавы і ездзіў на даху аўтамабіля. Аднак прадстаўніца паліцыі адзначае, што дакладна пакуль невядома – чакаюць вынікаў аналізаў.
«Мужчына не стаў тлумачыць сваіх паводзінаў, камунікацыя з ім была вельмі ўскладненая. На гэты момант невядома, чаму ён паводзіўся такім чынам», – працягвае Паўліна Анышка.
Паліцыя атрымала заявы ад трох кіроўцаў, якім беларус нанёс шкоду.
«Дзеянні паводле гэтай справы праводзяцца пад наглядам варшаўскай пракуратуры раёну Прага Поўнач. На гэты момант вядзецца праца ў гэтай справе, працаўнікі паліцыі збіраюць і аналізуюць матэрыялы. Мужчына дагэтуль не дапытаны, яму пакуль не выстаўлена ніякіх абвінавачанняў», – адзначае прэс-сакратарка.
У мэтах абароны персанальных звестак імені і прозвішча гэтага беларуса не называюць. Паведамляецца толькі, што яму 34 гады. Раней СМІ пісалі, што яму 35 гадоў.
Навіна пра беларуса, які голым пад наркотыкамі ўчыніў шэраг ДТЗ, з’явілася 15 красавіка. Паведамлялася, што ён за стырном аўта ўрэзаўся ў два аўтамабілі, а пасля гэтага вылез на дах сваёй машыны.
Відаць, хтосьці іншы тым часам стаў кіраваць, бо машына працягнула рух і ўрэзалася ў адбойнік. Мужчына ўпаў на ўзбочыну, а аўтамабіль яшчэ раз сутыкнуўся з іншым аўтам. Але беларус не спыніўся – прыліп ззаду да цяжкавіка і «праехаўся прычэпам». Далей мужчына цалкам раздзеўся і заскочыў на дах свайго аўта.
Дар'я Форман, Арсен Рудэнка belsat.eu
