«Rzeczpospolita» ў сваім матэрыяле сцвярджае, што зніклая спікера Каардынацыйнай рады Анжаліка Мельнікава не працавала ў Польшчы, а таксама не атрымлівала ўзнагароды ў фондзе «Białoruś Liberty», але «раскідвалася» грашыма. Ці так гэта, мы спыталі ў кіраўніка Народнага антыкрызіснага ўпраўлення Паўла Латушкі.
«Сапраўды стварала ўражанне чалавека, якому не патрэбныя грошы»
«Фінансава ў яе ўсё было вельмі добра. Будучы старшынёй Каардынацыйнай рады, стварыла сваю ўласную прэмію памерам 10 тыс. еўраў для людзей, якія маюць новыя ідэі і хочуць здзяйсняць розныя праекты. Яна нават адмовілася ад заробку, бо ў нас у арганізацыі склалася крызісная сітуацыя і нястача сродкаў», – цытуе «Rzeczpospolita» Паўла Латушку.
Выданне піша, што Мельнікава давала грошы дзеячам беларускай апазіцыі ў Варшаве і не патрабавала іх вяртаць. Пры гэтым у Паўла Латушкі такая дзейнасць спікеркі «не выклікала ніякіх падазрэнняў». Маўляў, яна тлумачыла гэта добрым прыбыткам мужа-айцішніка.
Але ў НАУ паведамілі «Белсату», што ніколі не казалі пра тое, што Мельнікава не працавала.
«Сцвярджэнне, што Анжаліка не працавала, нам не належыць. І мы ніколі так не казалі. Яна працавала ў камандзе НАУ і атрымлівала заробак. У астатнім яна сапраўды стварала ўражанне чалавека, якому не патрэбныя грошы», — адказалі нам у прэс-службе НАУ.
Таксама мы спыталіся, ці вядома, куды спікерка паляцела з Лондану. Але паводле інфармацыі на сённяшнюю раніцу ад праваахоўных органаў Польшчы, зменаў у расследаванні не адбылося.
«Але пры гэтым, як мы і казалі раней, Павел Латушка накіраваў запыт генеральнаму пракурору Польшчы з просьбай прыняць нагляд за справай пра знікненне Анжалікі Мельнікавай. Мяркуем, што гэта таксама паспрыяла таму, што нагляд за расследаваннем ажыццяўляе пракурор Нацыянальнай пракуратуры Польшчы», – адказала прэс-служба НАУ.
На пытанне, навошта Латушка інфармаваў прадстаўнікоў Еўрапарламенту ў Польшчы пра знікненне Мельнікавай, нам адказалі, што такім чынам прыцягваюць увагу да гэтай справы.
«Гэта пытанне інфармавання еўрапейскіх партнёраў, а таксама адзін з інструментаў прыцягнення ўвагі да сітуацыі на высокім узроўні», – кажуць у НАУ.
Абноўлена. У НАУ расказалі, што Мельнікава дакладна пазычала аднаму калегу, але ён не паспеў вярнуць ёй грошы, бо яна знікла. Дадаюць, што не было такога, каб яна «направа-налева раздавала грошы», але сапраўды пазычыла. Колькі, не могуць сказаць, бо гэта асабістая інфармацыя.
Апошні раз была на сувязі 21 сакавіка. Дзе яна цяпер, невядома
Нагадаем, ужо тры тыдні няма звестак пра спікерку Каардынацыйнай рады Беларусі Анжаліку Мельнікаву. Апошні раз з жанчынаю размаўлялі праз «Zoom» 21 сакавіка, але адкуль яна выходзіла на сувязь, невядома. Мельнікава абяцала прыйсці ў офіс 24 сакавіка, але не прыйшла, спаслалася на хваробу. Не выходзіла на сувязь з 25 сакавіка. Паплечнікі забілі трывогу 28 сакавіка.
Дакладна вядома, што 19 сакавіка ў ейны акаўнт заходзілі з беларускага IP-адрасу і з тэлефона Мельнікавай, якім яна карысталася для ўваходу ў акаўнт з пачатку працы спікеркай КР. Але IP-адрас можна падмяніць з выкарыстаннем VPN.
26 лютага Мельнікава пакінула Польшчу, паляцела ў Лондан. Як сцвярджае Аляксей Лявончык, які каардынуе пошукі Мельнікавай у Злучаным Каралеўстве, пасля прылёту ў Лондан яна амаль адразу пакінула яго і паляцела ў іншую краіну. Куды, Лявончык не паведаміў.
Дэпартамент у справе арганізаванай злачыннасці і карупцыі Нацыянальнай пракуратуры Польшчы 16 красавіка распачаў следства наконт знікнення Анжалікі Мельнікавай. Як паведамілі «Белсату» ў ведамстве, заведзеная крымінальная справа.
На рахунках фонду «Białoruś Liberty» засталіся некалькі дзясяткаў тысячаў долараў, што належаць «Кіберпартызанам». Доступ да гэтых грошай мела толькі Мельнікава.
Дар'я Форман, Тэса Анэйда / belsat.eu
