Дзе за мяжой адсвяткаваць галоўнае свята хрысціянаў – Вялікдзень, разам «са сваімі» – з беларусамі і на роднай мове? Сабралі анонсы ўрачыстасцяў у розных краінах і суполках асноўных хрысціянскіх канфесіяў.
Літва
Вільня
Рыма-каталіцкая парафія Святога Апостала Барталамея для вернікаў беларускага паходжання (Šv. Apaštalo Baltramiejaus bažnyčia).
Расклад набажэнстваў:
Вялікая Пятніца, 18 красавіка
- 9:00 – 17:30 – Адарацыя ў «цямніцы»;
- 17:30 – Крыжовы шлях і магчымасць споведзі;
- 18:30 – Літургія мукі Гасподняй.
Вялікая Субота, 19 красавіка
- 9:00, 12:00, 17:00, 18:00 – пасвячэнне святочных страваў на Велікодны стол;
- 23:00 – Пасхальная Вігілія (з сабой трэба прынесці свечкі ці набыць у кіёску пры касцёле). Пасля Вігіліі – працэсія.
Вялікдзень, нядзеля, 20 красавіка
- 12:00 – урачыстая служба.
Беларуская праваслаўная супольнасць Сусветнага патрыярхату ў Вільні
Вялікая субота, 19 красавіка
- 10:00 – Літургія;
- 11:00 – 21:00 – Асвячэнне Велікодных страваў (Bokšto g., 4).
Вялікдзень, Пасха Хрыстова, нядзеля, 20 красавіка
- 00:00 – Велікодная начная Літургія (Vokiečių g., 20, Лютэранская царква);
- 10:00 – Пасхальная абедніца для дзяцей, Bokšto g., 4.
Польшча
Варшава
Касцёл Святога Аляксандра, Плошча Трох Крыжоў (plac Trzech Krzyży).
Расклад набажэнстваў:
Вялікая Пятніца, 18 красавіка
- 18:00 – Літургія Мукі Пана ў дольным касцёле.
Вялікая Субота, 19 красавіка
- 12:00 – асвячэнне святочных страваў;
- 21:00 – Пасхальная Вігілія ў верхнім касцёле.
Вялікдзень, нядзеля, 20 красавіка
- 10:30 – урачыстая служба ў касцёле Святой Фаўстыны, ul. Żuromińska, 2;
- 11:30 – урачыстая служба ў касцёле на Плошчы Трох Крыжоў.
Велікодная акцыя ля помніка Каперніку
Беларусы запрашаюць сабрацца на Вялікдзень на мітынг у цэнтры Варшавы, каб нагадаць, што ў галоўнае хрысціянскае свята вернікі ў нашай краіне не толькі святкуюць, але і церпяць праз несправядлівасць і катаванні за кратамі.
,,«20 красавіка ў гэтым годзе Вялікдзень і для каталікоў, і для праваслаўных, свята для хрысціянаў па ўсім свеце. І толькі ў Беларусі ксяндзы-«экстрэмісты» і святары-«тэрарысты» мусяць прымаць пакуты за сумленнасць як у біблейскія часы. У краіне аднаго «бога» бязбожнікі катуюць божых служак», – гаворыцца ў анонсе мерапрыемства.
Актывісты ўзгадваюць рэпрэсаваных беларускіх святароў:
• каталіцкі святар Генрых Акалатовіч адбывае 11 гадоў – «здрада дзяржаве»;
• прапаведнік Мікалай Хіла асуджаны на 4 гады – «экстрэміст»;
• ксёндз Анджэй Юхневіч – чакае суду з цяжкімі абвінавачваннямі;
• праваслаўны святар Аляксандр Кухта – «удзельнік экстрэмісцкага фармавання»;
• былы іераманах Аляксандар Тарасенка пакараны за «абразу прэзідэнта».
«У свята Вялікадня – Уваскрасенне Збаўцы – мы выходзім, бо хочам збаўлення свайму народу. Хай набліжаецца наш Вялікі дзень – вызвалення ад зла! », – заклікаюць арганізатары.
Месца і час акцыі: Варшава, Помнік Каперніка, 20 красавіка, нядзеля, 14:00.
Беларускі Хрысціянскі збор, ul. Puławska 114
Беларусы-хрысціяне, якія шточацвер збіраюцца ў Варшаве на вуліцы Пулаўскай размаўляць пра Бога, веру, Біблію, запрашаюць на асаблівае святкаванне Вялікдня па-беларуску.
«Прыходзь, каб:
- перажыць гісторыю Вялікдня разам з варшаўскай батлейкай;
- пачуць сапраўдныя велікодныя спевы – цёплыя, душэўныя, на роднай мове;
- пагаманіць па-свойму за кубачкам гарбаты з прысмакамі і адчуць сябе як удома;
- адкрыць для сябе беларускіх майстроў на святочным кірмашы», – пішуць арганізатары ў анонсе.
Дата і месца святквання: панядзелак, 21 красавіка, 17:00, Варшава, , ul. Puławska, 114. Уваход вольны.
Кракаў
Касцёл Святога Стэфана, ul. Sienkiewicza 19
Расклад набажэнстваў:
Вялікая Пятніца, 18 красавіка
- 18:00 – Літургія Мукі Пана. Чытанне на беларускай мове.
Вялікая Субота, 19 красавіка
- 09:00 – 16:00 – кожныя 15 хвілінаў – пасвячэнне страваў;
- 19:00 – служба на польскай мове. Літургія Слова – у тым ліку па-беларуску.
Вялікдзень, нядзеля, 20 красавіка
- 15:30 – служба на беларускай мове.
Велікодны панядзелак, 21 красавіка
- 15:30 – служба на беларускай мове.
Лодзь
Касцёл Святога Юзафа, ul. Ogrodowa, 22
Вялікая Субота, 19 красавіка
- 21:00 – Пасхальная Вігілія, на польскай і беларускай мовах.
Вялікдзень, нядзеля, 20 красавіка
- 13:15 – урачыстая служба на беларускай мове і супольнае святкаванне.
Вялікая Брытанія
Лондан
Грэка-каталіцкая царква Святога Кірылы Тураўскага і ўсіх святых заступнікаў беларускага народу (St. Cyril of Turau Belarusian Catholic Church, Marian House, Holden Ave, N12 8HY, London).
Расклад набажэнстваў:
Вялікая Пятніца, 18 красавіка
- 17:30 – традыцыйная служба пахавання Хрыста з вынасам Плашчаніцы.
Вялікая Субота, 19 красавіка
- 20:00 – Велікодная служба па-беларуску, распачнецца з працэсіі. Запрашаюць прыносіць хлеб, яйкі, сыр і мяса для асвячэння, а таксама ежу і напоі для супольнага пачастунку пасля службы.
Ганна Ганчар belsat.eu
