Тры тыдні шукаюць спікерку Каардынацыйнай рады Беларусі. У Польшчы падазраюць выкраданне. Беларускія медыі тым часам спрабуюць даведацца хоць нешта, што паказала б на прычыны знікнення.
Беларуская служба радыё «Свабода» ўзнавіла храналогію знікнення спікеркі Каардынацыйнай рады Анжалікі Мельнікавай. Апошні ейны публічны выступ быў у пачатку лютага на Форуме Касцюшкі ў Гданьску, апошняе з’яўленне ў эфіры – 6 сакавіка на «Еўрарадыё» ў праграме «Ідэя X» Змітра Лукашука.
Тое выданне запісалі раней – 21 лютага. Як расказаў Лукашук, праграму з Мельнікавай збіраліся выдаць пазней, у сярэдзіне сакавіка, але Мельнікава «вельмі папрасіла», каб праграма выйшла менавіта 6 сакавіка. Чаму – невядома, але Лукашук не бачыць у гэтым нечага незвычайнага, як і ў ейных паводзінах у эфіры – хіба была крыху стомленай.
26 лютага Мельнікава пакінула Польшчу, паляцела ў Лондан. Як сцвярджае Аляксей Лявончык, які каардынуе пошукі Мельнікавай у Злучаным Каралеўстве, пасля прылёту ў Лондан яна амаль адразу пакінула яго і паляцела ў іншую краіну. Куды, Лявончык яшчэ не паведамляе.
Анжаліка магла не быць афіцыйна разведзеная з мужам Андрэем Мельнікавым, які выехаў з Польшчы ў Беларусь 3 сакавіка. Як адзначыў сайт Reform.news, Мельнікаў працаваў у Польшчы як індывідуальны прадпрымальнік, а ў інфармацыі аб прадпрыемстве дагэтуль пазначана, што гэта «супольная ўласнасць сямейнікаў» (małżeńska wspólność majątkowa). Адрасам рэгістрацыі пазначанае апошняе месца жыхарства сям’і, дзе Мельнікавы жылі прынамсі з канца мінулага года. На думку Reform.news, гэта значыць, што звесткі пра сямейны статус дастаткова актуальныя. Сама Мельнікава казала, што разышлася з мужам, але калі гэта і праўда, то развод не пазначылі ў рэестры («Еўрарадыё» адзначае, што гэтае пазначэнне добраахвотнае – паводле заяўнага прынцыпу).
Мельнікава раздавала грошы актывістам, расказвае польская «Rzeczpospolita». Паводле кіраўніка Народнага антыкрызіснага ўпраўлення і паплечніка Мельнікавай у Каардынацыйнай радзе Паўла Латушкі, сама прафінансавала паседжанне КР, калі Рада засталася без фінансавага падтрымання Злучаных Штатаў; стварыла ўласны прыз памерам 10 тысяч еўраў для актывістаў, якія хочуць рэалізаваць уласныя праекты; пазычала грошы актывістам і не патрабавала вяртання. Сябрам Мельнікава тлумачыла, што грошы мае, бо муж добра зарабляе ў IT.
Абноўлена. У пачатковай версіі публікацыі паведамлялася са спасылкай на «Rzeczpospolita», што яна не працавала ў Польшчы і адмовілася ад заробку ў КР. Гэта не так. Павел Латушка ўдакладніў «Белсату», што такога не казаў: Мельнікава працавала ў камандзе НАУ і атрымлівала заробак. Выканаўца абавязкаў спікеркі КР Стася Гліннік удакладніла, што ў КР няма заробкаў для дэлегатаў.
У Польшчы завялі справу з нагоды знікнення Мельнікавай, падазраюць выкраданне. Апошні раз з жанчынаю размаўлялі праз «Zoom» 21 сакавіка, але адкуль яна выходзіла на сувязь, невядома. Мельнікава абяцала прыйсці ў офіс 24 сакавіка, але не прыйшла, спаслалася на хваробу. Не выходзіла на сувязь з 25 сакавіка. Паплечнікі забілі трывогу 28 сакавіка. Версіяў знікнення шмат, але дакладнай інфармацыі мала.
Дакладна вядома, што 19 сакавіка ў ейны акаўнт заходзілі з беларускага IP-адрасу і з тэлефона Мельнікавай, якім яна карысталася для ўваходу ў акаўнт з пачатку працы спікеркай КР. Але IP-адрас – гэта не фізічная лакацыя апарата, гэты адрас можна падмяніць з выкарыстаннем VPN.
Алесь Наваборскі belsat.eu
