У Варшаве звярнулі ўвагу на планы Менску завезці ў Беларусь 150 тысячаў пакістанцаў. У суседняй краіне апасаюцца, што насамрэч мігранты прыедуць да нас не працаваць, а штурмаваць межы з краінамі ЕЗ.
«Нельга выключаць сцэнара, што сцягванне дзясяткаў тысячаў пакістанцаў – гэта не пытанне беларускага рынку працы, а чарговы этап гібрыднай вайны, якая шмат гадоў трывае пад кантролем Расеі і пры ўдзеле беларускага рэжыму і скіраваная супраць Польшчы і краінаў Балтыі», – піша польскае выданне Niezależna.pl.
На мінулым тыдні Аляксандр Лукашэнка заявіў, што дамовіўся з «сваім сябрам», прэм'ер-міністрам Пакістану, наконт «адмыслоўцаў розных галінаў», якія прыедуць у Беларусь працаваць.
«Кіраўніцтва Пакістану дапаможа нам падабраць такіх людзей. Няхай гэта будзе 100 тысяч, можа быць, 120–150 тысяч гэтых адмыслоўцаў. Мы гатовыя прыняць іх у Беларусі і стварыць ім неабходныя ўмовы для працы».
Дарадца прэзідэнта Польшчы, старшыня Інстытуту нацыянальнай бяспекі Станіслаў Жарын у каментары Niezależna.pl адзначыў, што польская выведка і контрвыведка маюць высветліць сапраўдныя мэты прываблівання пакістанцаў у Беларусь, пагатоў раней, паводле Жарына, «Беларусь цынічна і адкрыта выкарыстоўвала студэнцкія або працоўныя візы для сілкавання міграцыйнага маршруту»:
«Такі сігнал пра пашырэнне супрацы з Пакістанам мусіць насцярожваць. Найбліжэйшыя месяцы могуць быць вельмі актыўнымі на мяжы з Беларуссю. Расейскі і беларускі рэжымы будуць выкарыстоўваць гэты шлях для дэстабілізацыі і палярызацыі Польшчы. Такія пагадненні могуць прадракаць яшчэ большы ціск на мяжу».
Ананімны Telegram-канал «Беларуская выведка» распаўсюдзіў канспіралагічную версію пра тое, што ў Менску таемна рыхтуецца «маштабная гібрыдная атака з выкарыстаннем істотнага згуртавання мігрантаў» і гэтая аперацыя «можа насіць характар гібрыднага ўварвання».
Сцвярджаецца, што разам з сапраўднымі працоўнымі мігрантамі ў Беларусь прыедзе «група падрыхтаваных асобаў збольшага з Афганістану, а таксама ў меншай колькасці – з Сірыі, Лівіі і іншых гарачых афрыканскіх пунктаў»:
«Гэтыя асобы будуць мець спецпадрыхтоўку, баявы досвед партызанскай вайны, працяглага перабывання і перасоўвання ва ўмовах перасечанай мясцовасці, валодаць навыкамі выжывання ў цяжкіх умовах і будуць здольныя праводзіць спецыяльныя аперацыі».
Канал піша яшчэ, што гэтая аперацыя ўзгодненая з Масквою і плануецца для «дэстабілізацыі сітуацыі на ўсходніх межах ЕЗ і ўнясення разладу ў хаўрусніцкія дамовы заходніх краінаў, у тым ліку і NATO».
Палітычны аглядальнік радыё «Свабода» Валер Карбалевіч сумняецца, што такая мігранцкая атака насамрэч рыхтуецца. У каментары «Белсату» ён адзначыў, што пакістанцы, якія прыедуць у Беларусь, могуць і без удзелу беларускай дзяржавы спрабаваць прарывацца ў ЕЗ:
,,«У Еўропе больш магчымасцяў, там большыя заробкі, там сацыяльная абарона, у параўнанні з Беларуссю гэта больш выгодна, і таму я б такога не выключаў. Людзі прыедуць, агледзяцца, паглядзяць на магчымасці і падумаюць: можа, лепш туды прарывацца? Не думаю, што гэта будзе нейкая такая адмыслова спланаваная акцыя ці то беларускіх, ці то расейскіх, ці то пакістанскіх уладаў».
Зрэшты, аналітык не ўпэўнены, што ўся гэтая задума з пакістанцамі, якія выратуюць Беларусь ад дэфіцыту работнікаў, ажыццявіцца:
«Лукашэнка шмат праектаў ініцыюе, з якіх нічога потым не атрымоўваецца – поўны пшык. Гэта пакуль голая ідэя, нічым не падмацаваная. Тут шмат пытанняў, і пакуль рана казаць пра нейкую практычную рэалізацыю».
Паводле Карбалевіча, ідэя з пакістанцамі магла быць звычайным экспромтам.
«Думаю, ніхто нічога не падлічваў. Гэта была проста спантанная прапанова. Ёсць праблема, не стае працоўных рук, Лукашэнка гэта ўсведамляе, ну, вось ён хоча прадэманстраваць і пакістанскаму боку, і свайму насельніцтву, і эліце, што ён можа развязаць гэтую праблему, запрасіўшы мігрантаў», – падсумаваў суразмоўца «Белсату».
Як бы там ні было, у Польшчы рыхтуюцца да правакацыяў. Намеснік міністра ўнутраных справаў і адміністравання гэтай краіны Мацей Душчык у эфіры тэлеканалу «TVP Info» адзначыў, што ўмацаванне мяжы з Беларуссю дае вынікі: шанцаў прарвацца ўсё менш.
«Лукашэнка, які прывёз гэтых людзей, сёння мае з імі праблемы, бо яны не могуць мінуць мяжу, і, імаверна, ён захоча зрабіць яшчэ нейкія правакацыі, вельмі імаверна нават з ужываннем гвалту да гэтых мігрантаў. Аднак мы ведаем, як рэагаваць, ведаем, што Лукашэнка жадае абвастрыць гэты канфлікт. Цяпер ён б'ецца аб сцяну, бо агароджа ўмацаваная», – сказаў польскі чыноўнік.
Ён паведаміў пра выпадак з гібеллю некалькіх мігрантаў, якія спрабавалі трапіць у Польшчу па рацэ Буг. Паводле Душчыка, гэтых людзей скінулі ў ваду беларускія службоўцы.
«Польшча ў гэтым канфлікце абараняецца, Беларусь атакуе. Беларусь будзе ўжываць розныя сітуацыі, спрабуючы дэстабілізаваць нас, таму што дэстабілізацыя польска-беларускай мяжы – гэта дэстабілізацыя ўсяго Еўразвязу», – падсумаваў намеснік міністра ўнутраных справаў суседняй краіны.
Сцяпан Кубік belsat.eu
