Дэпартамент у справе арганізаванай злачыннасці і карупцыі Нацыянальнай пракуратуры Польшчы 16 красавіка распачаў следства наконт знікнення Анжалікі Мельнікавай. Як паведамілі «Белсату» ў ведамстве, заведзеная крымінальная справа.
Матэрыялы папярэдняга правярання, пачатага паводле факту знікнення спікеркі Каардынацыйнай рады Анжалікі Мельнікавай, зарэгістраваныя ў Люблінскім аддзеле Дэпартаменту ў справах арганізаванай злачыннасці і карупцыі. Гэта структурная адзінка Нацыянальнай пракуратуры Польшчы. Прадстаўніца ведамства Катажына Цалеў-Яшэўска паведаміла «Белсату», што сёння пачалося следства:
,,«У гэтай справе сёння ініцыяванае следства, у тым ліку паводле артыкулу Крымінальнага кодэксу "Незаконнае пазбаўленне волі“. Мэта разбору – высвятленне акалічнасцяў знікнення і імавернага пазбаўлення волі ў сакавіку Анжалікі М. Справа даручаная Агенцтву ўнутранай бяспекі».
Раней паведамлялася, што справаю будзе займацца Мазавецкі аддзел Дэпартаменту ў справах арганізаванай злачыннасці ў Варшаве, аднак матэрыялы перадалі ў Люблін:
,,«Гэта звязана з тым, што Мазавецкі аддзел моцна перагружаны колькасцю справаў».
Мельнікава пакінула Польшчу і Еўразвяз 26 лютага 2025 года, яна не выходзіла на сувязь з 25 сакавіка. Сузаснавальнік «BY_Help» і «BYSOL» Аляксей Лявончык раней казаў «Белсату», што мае пэўную інфармацыю пра яе маршрут, аднак інфармацыя не спраўджаная, таму дэталяў ён не даў.
Дзеці Анжалікі разам з бацькам, яе былым мужам, цяпер у Беларусі.
Дар'я Форман, Сцяпан Кубік belsat.eu
