Расейскі дом у Гомлі адправіў чарговую партыю гомельскіх школьнікаў у анексаваны Крым – з парушэннем законаў і пад патранажам Расеі ды з усмешкамі на камеру.
Гэтым разам групу старэйшакласнікаў з Гомля зноўку выправілі ў знаны дзіцячы лагер «Артэк» на тэрыторыі анексаванага Крыму. Відэасправаздачу апублікавала мясцовае аддзяленне Расейскага дому. На кадрах – усмешлівыя дзеці і бацькі ды ні слова пра тое, што такая паездка можа не толькі мець юрыдычныя наступствы для яе ўдзельнікаў, але і каштаваць дзецям жыцця.
Нагадаем, уезд на тэрыторыю Крыму праз тэрыторыю Расеі трактуецца заканадаўствам Украіны як незаконны пераход дзяржаўнай мяжы. За такія дзеянні прадугледжаная крымінальная адказнасць. Больш за тое, у будучыні ўдзельнікі такіх захадаў могуць атрымаць забарону на ўезд не толькі ва Украіну, але і ў краіны ЕЗ, дзе дзеюць нормы павагі да міжнароднага права.
Арганізацыя «Расейскі дом» працуе пад патранажам «Рассупрацоўніцтва» – федэральнага органу Расеі, які спецыялізуецца на гуманітарнай экспансіі. У Беларусі цяпер дзеюць тры афіцыйныя прадстаўніцтвы гэтай структуры – у Менску, Берасці і Гомлі.
Пасля пачатку поўнамаштабнай вайны ва Украіне актыўнасць гэтых цэнтраў значна ўзрасла. Яны праводзяць ладзяць трэнінгі, выставы, конкурсы, кінаклубы, а таксама арганізоўваюць паездкі беларускай моладзі ў Расею і анексаваны Крым. Усё гэта – пад выглядам культурніцкага абмену, але на справе – прапагандысцкая праца, якая супярэчыць міжнародным дамовам і заклікам да міру.
Гэтая структура знакамітая тым, што, нягледзячы на вайну, у абыход міжнароднага права, ужо некалькі гадоў вывозіць беларускіх дзяцей у Крым, у тым ліку падчас выбухаў і пажараў на Крымскім мосце.
Пры гэтым арганізатары паездак нават не хаваюць маршрутаў: спачатку – цягніком у Маскву, затым – у Краснадар, і нарэшце – праз Крымскі мост у зону баявых дзеянняў.
Праваабаронцы звяртаюць увагу: па-першае, дзеці робяцца часткаю незаконнай дзейнасці, зарганізаванай пад выглядам адукацыі і культурніцкага абмену. Па-другое, іхная бяспека пад пагрозаю: Крым далёка не бяспечны рэгіён, і вайна набліжаецца ўсё бліжэй да паўвыспы.
Цікава і тое, што нават Міністэрства замежных справаў Беларусі афіцыйна рэкамендуе грамадзянам выконваць заканадаўства Украіны пры наведванні Крыму. Але структуры кшталту Расейскага дому гэтыя рэкамендацыі, як відаць, не цікавяць. Бо галоўнае для іх – лаяльнасць да Масквы, нават калі гаворка пра беларускіх дзяцей.
Надзея Вольная / belsat.eu
