Пакуль улады Беларусі прызнаюць Сцяпана Пуцілу «тэрарыстам» і пагражаюць доўгатэрміновым зняволеннем, уплывовы часопіс «Forbes» залучыў яго ў еўрапейскі спіс маладых лідараў у сферы медыяў і маркетынгу.
У анатацыі «Forbes» адзначаецца:
«Сцяпан Пуціла – заснавальнік платформы Nexta, якую ён запусціў у 2015 годзе ў веку 17 гадоў для распаўсюду інфармацыі сярод грамадзянаў Беларусі. У хуткім часе платформа сталася адным з найбуйнейшых расейскамоўных навінавых рэсурсаў ва Усходняй Еўропе і адыграла ключавую ролю падчас пратэстаў у Беларусі ў 2020 годзе, даючы інфармацыю без цэнзуры. Праз журналісцкую дзейнасць Пуціла быў вымушаны пакінуць краіну і цяпер жыве ў выгнанні ў Польшчы, працягваючы ствараць навінавы кантэнт на тэмы актуальных падзеяў, палітыкі, тэхналогіяў і шмат іншага. Цяпер у Nexta 5,5 млн падпісчыкаў у сацыяльных сетках».
Нагадаем, што ў Беларусі на Сцяпана Пуцілу палююць сілавікі. У 2023 годзе яму завочна прысудзілі 20 гадоў пазбаўлення волі па абвінавачаннях у арганізацыі масавых закалотаў, распальванні сацыяльнай варожасці ды іншых дзеянняў, што ўлады лічаць «экстрэмісцкімі». Nexta і яго лагатып былі прызнаныя «экстрэмісцкімі матэрыяламі», а Пуцілу залучылі ў спіс асобаў, датычных да тэрарыстычнай дзейнасці.
У 2022 годзе польскі суд адмовіў у экстрадыцыі Пуцілы ў Беларусь, назваўшы патрабаванне ўладаў Беларусі «юрыдычна недапушчальным». Суддзя адзначыў, што экстрадыцыя запатрабаваная «псіхапатычным дыктатарам» і супярэчыць стандартам дэмакратычных краінаў і Дэкларацыі правоў чалавека.
Сцяпан Пуціла працягвае журналісцкую дзейнасць з Польшчы. Заснавальнік Nexta стаўся адным з тых, хто змяняе інфармацыйную прастору з выгнання як адзін з найбуйнейшых расейскамоўных навінавых рэсурсаў ва Усходняй Еўропе.
Надзея Вольная / belsat.eu
