У папраўчыя калоніі Беларусі сталі пускаць на кароткатэрміновыя і працяглыя спатканні грамадзянаў, якія жывуць у незарэгістраваным шлюбе. Пра гэта паведамляе праваабарончае выданне MAYDAY.TEAM.
Выданне адзначае, што раней гэтую катэгорыю ў праваахоўных органах трактавалі як «сужыўцаў» і спатканні ім былі забароненыя. У калоніі пускалі толькі сваякоў, унесеных у асабістую справу асуджанага. Для гэтага трэба было даслаць копіі дакументаў, што пацвярджаюць сваяцтва.
Аднак MAYDAY.TEAM сталі вядомыя выпадкі ў некаторых папраўчых калоніях, калі так званым цывільным жонкам дазволілі сустрэцца з мужамі на кароткатэрміновых і працяглых спатканнях.
Для гэтага грамадзяне мусілі звярнуцца да ўчастковага з заявай, каб ім выдалі пацверджанне пра пражыванне разам грамадзянаў, не распісаных афіцыйна ў ЗАГСе. Далей міліцыянт мусіў наведаць месца жыхарства і пацвердзіць, што пражыванне разам мела месца (напрыклад, такім пацвярджэннем могуць быць супольныя дзеці).
Далей даведка за подпісам участковага высылаецца на адрас начальніка папраўчай установы, а асуджаны піша хадайніцтва, каб «цывільная» жонка або муж былі ўнесеныя ў ягоную асабовую справу.
Раней паведамлялася, што ў Бабруйскай папраўчай калоніі № 2 з 1 снежня 2024 года сваякам асуджаных, якія прыязджаюць на працяглыя спатканні, забаранілі пакідаць тэрыторыю пенітэнцыярнай установы да канца сустрэчы.
Якуб Хруст belsat.eu
