У Міністэрстве замежных справаў Польшчы пракаментавалі засяленне Генеральнага консульства Расеі ў Горадні ў будынак, які раней належаў арганізацыі польскай меншасці «Польска Мацеж Школьна».
«Гэта няўмелая правакацыя. Аднак мы не плануем афіцыйнага пратэсту з гэтай нагоды», – заявілі ў МЗС Польшчы, паведамляе «RMF FM».
З 24 сакавіка Генеральнае консульства Расеі ў Горадні прымае наведнікаў па новым адрасе – вул. Гараднічанская, 40. Раней тут размяшчалася адна з найстарэйшых польскіх арганізацыяў у Беларусі – «Польска Мацеж Школьна», якая існавала з 1995 года. У гэтым будынку працаваў грамадскі ліцэй імя Элізы Ажэшкі, дзе вывучалі польскую мову, гісторыю і культуру. Ліцэй лічыўся найбуйнейшай польскай грамадскай школай у свеце паводле колькасці вучняў. Акрамя таго, пры арганізацыі працавалі бібліятэка, універсітэт трэцяга веку для пажылых людзей, жаночы клуб «Граднянка» і іншыя адукацыйныя і культурныя ініцыятывы.
Рэпрэсіі супраць «Польскай Мацежы Школьнай» пачаліся ў 2021 годзе. Арганізацыю абвінавацілі ў незаконнай адукацыйнай дзейнасці, выпісалі штраф памерам 300 тысяч рублёў, а затым падатковая налічыла яшчэ 500 тысяч рублёў нібыта недаплачаных падаткаў. Нягледзячы на спробы зарэгістраваць новую юрыдычную асобу і выплату штрафаў, у 2022 годзе арганізацыю ліквідавалі.
У 2023 годзе будынак набыў новы ўласнік. Першапачатковым пакупніком была група кампаніяў «Спектр», але пазней будынак перайшоў іншым уладальнікам. Пасля гэтага на тэрыторыі з’явіліся элементы ахоўнай інфраструктуры, характэрныя для консульства: будка аховы, плот і сістэма відэаназірання.
Якуб Хруст belsat.eu
