Прэзідэнт Украіны Уладзімір Зяленскі публічна звярнуўся да Доналда Трампа з запрашэннем наведаць Украіну, каб уласна пераканацца ў маштабе разбурэнняў, якія прынесла з сабой расейская агрэсія.
У інтэрв’ю праграме «60 Minutes» на амерыканскім канале CBS News Уладзімір Зяленскі заклікаў прэзідэнта ЗША прыехаць у любую з разбураных расейцамі тэрыторый і ўбачыць наступствы на ўласныя вочы.
,,«Мы хочам, каб вы прыехалі і паглядзелі. Прыязджайце і паглядзіце на людзей, на мірных жыхароў, на воінаў, на шпіталі, цэрквы, дзяцей – знішчаных або забітых. Прыязджайце, паглядзіце, а потым давайце, давайце рухацца з планам, як скончыць вайну. Вы зразумееце, з кім маеце справу. Вы зразумееце, што зрабіў Пуцін. І мы нічога не будзем рыхтаваць. Гэта не будзе тэатр з падрыхтаванымі акторамі на вуліцах і ў цэнтры [горада]. Мы такога не робім. Нам гэта не патрэбна. Вы зможаце пайсці дакладна туды, куды самі захочаце – у любы горад, які быў пад абстрэлам», – сказаў Уладзімір Зяленскі.
Украінскі прэзідэнт падкрэсліў, што Расея штодня наносіць удары па ўкраінскіх гарадах. Паводле ягоных словаў, з пачатку поўнамаштабнага ўварвання было здзейснена каля 1700 атак па школах, забіта 600 дзяцей, атакавана 780 бальніц і клінік. Паводле яго слоў, загінула ўжо каля 13 тысяч мірных жыхароў, а колькасць палеглых украінскіх вайскоўцаў можа дасягаць 100 тысяч чалавек. І ўсё гэта – за «марную вайну Уладзіміра Пуціна за пашырэнне Расеі да парога NATO».
Запрашэнне прагучала на фоне аднаго з самых крывавых удараў гэтага года, калі расейскія балістычныя ракеты абрынуліся на Сумы падчас Вербніцы, забраўшы жыцці 34 чалавек (сярод іх двое дзяцей), больш за 110 атрымалі раненні. Гэта выклікала шырокае асуджэнне з боку заходніх партнёраў Украіны.
У сваю чаргу, Дональд Трамп, каментуючы трагедыю, заявіў, што, паводле атрыманай ім інфармацыі, «Расея зрабіла памылку».
«Я думаю, гэта было жахліва, і мне сказалі, што яны дапусцілі памылку. Я лічу, што гэта жахлівая рэч. Я лічу, што ўся гэтая вайна – жахлівая», – пракаментаваў Доналд Трамп.
Раман Шавель belsat.eu
