Стала вядома пра смерць сястры Васіля (Сябра) Парфянкова – ваяра палка Каліноўскага, які загінуў пад Лісічанскам у канцы чэрвеня 2022-га. Ягоную сястру звалі Алеся.
Пра тое, што жанчына пайшла з жыцця, «Белсату» распавяла крыніца выдання.
Вядома, што жанчына хварэла на анкалогію, і што ў 2022 годзе пасля ператрусу дому Алесю разам з маці арыштавалі ды змясцілі на Акрэсціна – проста за тое, што яны блізкія ваяра-добраахвотніка.
«Па іх прыехалі шэсць ці восем чалавек у поўным абмундзіраванні, правялі вобшук. Іх абвінавацілі ў непадпарадкаванні супрацоўнікам міліцыі і ў тым, што яны нібы напалі на тых, хто іх затрымліваў. Там жанчыны досыць малюсенькія, маці Васіля ў шаноўным узросце, ёй, здаецца, 67 гадоў, як яны маглі напасці? На судзе яны плакалі і гаварылі, каб яны не шылі ім тое, чаго не было насамрэч. Мама Васіля казала, што гатовая адсядзець, але за справу, а не за гэта… Да іх стабільна прыходзілі з вобшукамі, як я зразумела, кожныя паўгода. У нас ва ўсіх ком у горле быў. Было складана слухаць гэты суд, вельмі складана», – распавядала праваабаронцам жанчына, якой давялося адбываць содні разам з Алесяй і маці Васіля.
«Белсат» выказвае шчырыя спачуванні блізкім Алесі з нагоды ейнае смерці.
Надзея Вольная belsat.eu
