Прэзідэнт ЗША Доналд Трамп паведаміў, што падчас планавага медычнага агляду прайшоў таксама і кагнітыўны тэст. Як адзначыў 78-гадовы палітык, ён пастанавіў пайсці іншым шляхам, чымся ягоны папярэднік Джо Байдэн, які ад такіх правяранняў ухіляўся. У Белым доме апублікавалі вынікі тэсту.
Пра гэта заявіў Доналд Трамп 11 красавіка, не прывёўшы аднак ніякіх падрабязнасцяў пра характар тэсту ці яго вынікі.
,,«Я не ведаю, што яшчэ вам сказаць. Я адказаў правільна на ўсе пытанні», – заявіў Трамп журналістам 11 красавіка.
Трамп дадаў, што і раней неаднаразова праходзіў такія правяранні і заўжды бездакорна з імі спраўляўся. Пасля агляду ён, маўляў, адчуў сябе «ў выдатнай форме» і нават пажартаваў: «Добрае сэрца. Добрая душа. Вельмі добрая душа».
Вынікі даследавання 13 красавіка апублікавала ў сваім акаўнце сацыяльнай сеткі Х прэс-сакратарка Белага Дому Кэралайн Лэвіт.
,,«Прэзідэнт Трамп дэманструе выдатнае кагнітыўнае і фізічнае здароўе ды цалкам гатовы выконваць абавязкі галоўнакамандуючага і кіраўніка дзяржавы», – адзначаецца ў заключэнні.
У ЗША прэзідэнты традыцыйна час ад часу агалошваюць інфармацыю пра сваё здароўе. Гэта не патрабуецца законам, але сталася своеасабліваю палітычнаю традыцыяй.
У канцы свайго тэрміну Джо Байдэн сутыкнуўся з крытыкаю наконт магчымых кагнітыўных праблемаў, што ў выніку прымусіла яго адмовіцца ад удзелу ў выбарах 2024 года.
У 2021-м ён стаўся найстарэйшым прэзідэнтам ЗША, які ўступіў на пасаду ў веку 78 гадоў. Але цяпер яго абагнаў Доналд Трамп, які таксама вярнуўся ў палітыку ў веку 78 гадоў, будучы на некалькі месяцаў старэйшым. У чэрвені яму споўніцца 79.
Трамп, як і раней, зняпраўджвае любыя сумневы ў сваіх разумовых здольнасцях. Яшчэ ў 2018 годзе, падчас першага тэрміну, ён прайшоў кагнітыўны тэст, прызначаны для ранняй дыягностыкі дэменцыі, і атрымаў максімальныя 30 балаў. Тады ж ён называў сябе «вельмі стабільным геніем».
Раман Шавель belsat.eu
