Міністр унутраных справаў Томаш Семоняк заявіў, што апошнім часам «беларускія афіцэры ўдзельнічалі ў адкрытых правакацыях і агрэсіўных дзеяннях каля мяжы». Прэс-сакратар ведамства апублікаваў відэа здарэння.
«11 тысячаў працаўнікоў МУС і жаўнераў польскага войска ахоўваюць польска-беларускую мяжу. Не выклікае сумневаў шчыльная супраца службаў Беларусі з бандамі, што арганізоўваюць кантрабанду людзей з Афрыкі і Азіі. Апошнім часам беларускія афіцэры нават удзельнічалі ў адкрытых правакацыях і агрэсіўных дзеяннях каля мяжы», – напісаў у сацыяльнай сетцы X.com міністр унутраных справаў Томаш Семоняк.
Каб пацвердзіць гэтую заяву, прэс-сакратар міністра Яцэк Дабжыньскі апублікаваў відэа, знятае на мяжы недалёка ад вёскі Мельнік – з беларускага боку гэта Камянецкі раён Берасцейшчыны.
На запісы відаць, што парушальнікі спрабуюць распілаваць агароджу, а калі прымчаў аўтамабіль памежнікаў, зламыснікі пачалі закідваць яго камянямі. За плотам можна заўважыць асобу ў вайсковай форме хакі.
«Дзясяткі людзей спрабуюць нелегальна трапіць у Польшчу. Пры з'яўленні патруля нападнікі пачынаюць кідаць камяні ў аўтамабіль. У групе агрэсараў камера фіксуе беларускага службоўцу ў форме, які таксама атакуе камянямі нашых службоўцаў», – напісаў Дабжыньскі.
Міграцыйны крызіс на мяжы Беларусі з краінамі ЕЗ разгарэўся ў 2021 годзе, калі супраць Менску ўвялі санкцыі за прымусовую пасадку самалёта з Раманам Пратасевічам і Соф’яй Сапегай. Захад абвінавачвае ўлады Беларусі ў спрыянні нерэгулярнай міграцыі, Аляксандр Лукашэнка ў адказ сцвярджае, што Еўропа нібыта сама паклікала гэтых людзей, і не раз казаў, што «нікога лавіць тут не будзем, няхай ідуць».
Сёлета Памежная ахова Польшчы налічыла больш за 2 тысячы спробаў парушэння мяжы з боку Беларусі, з іх 1300 – у сакавіку.
У Літву сёлета намагаліся трапіць 288 парушальнікаў.
Сцяпан Кубік belsat.eu
