Згодна з зацверджанай сёлета ў сакавіку Канцэпцыяй дзяржаўнай жыллёвай палітыкі да 2030 года, у Беларусі распачнецца рэнавацыя жылфонду, паведаміла кіраўніца ўпраўлення жыллёвай палітыкі Менгарвыканкаму Алена Лукашэвіч, піша агенцтва «Минск-Новости».
Рэнавацыя закране ў тым ліку хрушчоўкі.
,,«Сёння час хрушчовак прайшоў. Так, гэта ўсё яшчэ дастаткова моцныя дамы, але, вядома, маральна і фізічна састарэлыя. Таму будзе запушчаная праграма рэнавацыі такога жыллёвага фонду. Прадугледжана, што грамадзянаў будуць перасяляць у іншыя кватэры ці выплочваць грашовую кампенсацыю», – распавяла чыноўніца.
Хрушчоўкі масава будаваліся ў Беларусі ў 1955–1975 гадах. Паводле інстытуту «Белжылпраект», у нашай краіне налічваецца 2568 такіх дамоў, з іх 1864 – панэльныя, 704 – цагляныя. У Менску 16 % ад усяго жыллёвага фонду (1076 дамоў) – гэта хрушчоўкі.
Паводле новай Канцэпцыі жыллёвай палітыкі, такія дамы «не адпавядаюць сучасным спажывецкім патрабаванням насельніцтва», а таксама патрабуюць шмат энергарэсурсаў на ацяпленне. У сувязі з гэтым іх рэнавацыя – пытанне «найбліжэйшай будучыні».
Марыя Міхалевіч belsat.eu
