Спецыяльны пасланнік Доналда Трампа Стывэн Ўіткаф пасля сустрэчы ў Вашынгтоне са спецыяльным прадстаўніком Пуціна Кірылам Дзмітрыевым распавёў прэзідэнту ЗША, як ён бачыць самы хуткі шлях да сканчэння вайны ва Украіне, піша «Reuters» са спасылкай на свае крыніцы.
Паводле амерыканскага чыноўніка, каб развязаць канфлікт, трэба прызнаць за Расеяй права на валоданне чатырма рэгіёнамі на ўсходзе Украіны: Данецкай, Луганскай, Запарожскай і Херсонскай вобласцямі, якія Масква акупавала ў 2022 годзе.
Са словаў дзвюх крыніцаў «Reuters», на сустрэчы таксама прысутнічаў спецыяльны пасланнік у справе Украіны Кіт Келаг, які запярэчыў Ўіткафу, што Кіеў ніколі не пагодзіцца на такія ўмовы. Трамп тады ніякіх рашэнняў не прыняў.
Сталася вядома, што Ўіткаф у парушэнне звычайных працэдураў бяспекі напярэдадні сустрэчы ў Белым доме запрасіў Кірыла Дзмітрыева на вячэру ў сваю асабістую рэзідэнцыю. Гэта выклікала трывогу ў Белым доме і Дзяржаўным дэпартаменце ЗША, бо звычайна амерыканскія чыноўнікі не прымаюць у сябе чыноўнікаў з Расеі, якая мае развітыя магчымасці выведкі.
Выданне «The Times» паведаміла са спасылкай на словы Кіта Келага, што ў рамках замірэння Украіну можна падзяліць на зоны кантролю, як гэта было ў Берліне ў 1945 годзе.
,,«Гэта магло б выглядаць амаль як у Берліне пасля Другой сусветнай вайны, калі ў вас была расейская зона, французская зона, брытанская зона, амерыканская зона», – прыводзіліся словы чыноўніка ў матэрыяле.
Пасля выхаду публікацыі Келаг, аднак, заявіў, што журналісты сказілі ягоныя словы і што ён не меў на ўвазе падзелу Украіны.
«Я казаў пра "сілы запэўнівання" для падтрымання суверэнітэту Украіны, пасля спынення агню. У дыскусіях пра падзел я меў на ўвазе зоны адказнасці для саюзных сілаў (без амерыканскіх войскаў). Я не меў не ўвазе падзелу Украіны», – напісаў Келаг на сваёй старонцы ў Х.
У адміністрацыі Трампа ўсё больш разыходжанняў адносна таго, як выйсці з тупіковай сітуацыі з вайной ва Украіне, зазначае «Reuters».
11 красавіка Стывэн Ўіткаф сустрэўся з Уладзімірам Пуціным. Перамовы адбываліся ў Санкт-Пецярбурзе і цягнуліся амаль 4,5 гадзіны. Гаворка на іх ішла пра «аспекты ўкраінскага ўрэгулявання», як паведаміла прэс-служба Крамля, аднак пра вынікі не распавяла.
Візіт Ўіткафа выглядаў даволі нечакана, у некаторых медыях яго называлі «экстранным». Але дзеля чаго спатрэбілася такая экстраннасць, застаюцца толькі здагадкі.
Паводле выдання «Axios», Доналд Трамп моцна раззлаваны тым, што Расея цягне з замірэннем на ўкраінскім фронце, і менавіта таму адправіў свайго прадстаўніка, каб атрымаць дакладны адказ, ці гатовыя расейцы спыняць агонь. Згодна з інфармацыяй выдання, калі да канца красавіка не ўдасца дасягнуць пагаднення аб спыненні агню, то Злучаныя Штаты могуць увесці дадатковыя санкцыі супраць Расеі.
Марыя Міхалевіч belsat.eu
