У Гомельскай вобласці рэгіянальныя аддзелы міліцыі атрымалі ў падарунак дроны ад прыватнай фірмы «Хобі-парк», якая ў сацсетках пазіцыянуе сябе як звычайны магазін цацак і тэхнікі.
Асабліва цікава, што гэтыя «падарункі» падчас аб’езду прыгранічных з Украінай раёнаў – Хойнікаў, Лоева, Ельска, Нараўлі, Брагіна і Мазыра – міліцыянтам перадаў асабіста намеснік міністра ўнутраных спрааў Мікалай Карпянкоў. Афіцыйна было абвешчана, што квадракоптары будуць выкарыстоўвацца для навучання «атрадаў народнага апалчэння».
На фота, апублікаваных дзяржаўнымі СМІ, бачна, што міліцыя атрымала FIMI X8 – адзін з самых танных непрафесійных дронаў, коштам менш за 2 500 беларускіх рублёў. Гэта мадэль падыходзіць хутчэй для аматараў, чым для ваенных ці аператыўных патрэбаў. Аднак менавіта такія «прэзенты» – пад выглядам падарункаў для вучэнняў – часта становяцца спосабам умацавання сувязяў паміж бізнесам і сілавым блокам, дзе бюджэтныя тэндары – галоўны прыз
Тая самая «крамка», якая пастаўляе тэхніку для МУС і КГБ
Справа ў тым, што фірма «Хобі-парк», якая падарыла дроны, ужо даўно фігуруе ў дзяржаўных тэндарах. У 2022 годзе яна выіграла закупку Міністэрства абароны на 56 дронаў DJI Mavic 2 Enterprise Advanced на агульную суму амаль 2 мільёны рублёў. Як пазней высветлілі незалежныя журналісты, цэны на дроны былі завышанымі. Нягледзячы на «цацкавы» імідж, у каталогу TIBO «Хобі-парк» пазіцыянуецца як дыстрыб’ютар прафесійных беспілотнікаў і антыдрон-сістэм, а таксама партнёр сілавых ведамстваў: МУС, КДБ, Мінабароны, ДПК і МНС.
Нагадаем, усё гэта адбываецца на фоне ўзмацнення кантролю на мяжы з Украінай і стварэння «народных апалчэнняў», ролю якіх улады афіцыйна не тлумачаць. Эксперты мяркуюць, што падобныя падарункі – гэта частка падрыхтоўкі да магчымых сцэнарыяў сацыяльнай нестабільнасці і спроба прыцягнуць мясцовыя кадры да прарасейскай сістэмы бяспекі.
Надзея Вольная belsat.eu
