Беларускі брэнд, вядомы патрыятычнымі матывамі ў сваім адзенні, пасупрацоўнічаў з расейскай спявачкай і тэлевядоўцай, якая падтрымала напад Расеі на Украіну. Чаму? Кажуць, не маюць з ёй «ніякіх негатыўных асацыяцыяў».
Кампанія «Mark Formelle» 1 красавіка пажартавала ў сацсетках, што расейская тэлевядоўца і спявачка Вольга Бузава стала іхнай крэатыўнай дырэктаркай і стварыла канцэпцыю новай калекцыі адзення. 7 красавіка стала зразумела, што прынамсі частка пра калекцыю не была жартам: «Mark Formelle» выпусціў у продаж калекцыю «Мне можно всё» ў калабарацыі з Бузавай. Які ўдзел у стварэнні адзення брала Бузава, на сайце не паведамляюць, але хваляцца, што яна стала «не толькі музай і тварам рэкламнай кампаніі, але і яе галоўнай мадэллю».
Супрацу з Бузавай некаторыя беларусы раскрытыкавалі ў сацсетках: адны проста за тое, што гэта чужая зорка, другія – за супрацу з прыхільніцай вайны супраць Украіны. За падтрыманне расейскай агрэсіі Бузава трапіла пад санкцыі Украіны і ў спіс распальвальнікаў вайны расейскага «Фонду барацьбы з карупцыяй».
«Белсат» пад выглядам пакупніка патэлефанаваў у «Mark Formelle», каб даведацца навошта беларускае прадпрыемства задумала калабарацыю з расейскай спявачкай, тым больш такой, якая падтрымлівае вайну.
,,«Проста гэта папулярная асоба... У нас няма ніякіх негатыўных асацыяцыяў з ёй. І Вольга Бузава папулярная ж не толькі ў Расеі», – патлумачылі на прадпрыемстве. «Усё-такі «Mark Formelle» гэта не толькі Беларусь. Нашыя крамы ёсць і за межамі Рэспублікі Беларусь. То бок, гэта не толькі Беларуссю абмяжоўваецца. Гэта Казахстан, Узбекістан, Расея», – патлумачылі там выбар гэтай спявачкі.
На нашую прапанову пасупрацоўнічаць наступным разам з айчыннымі зоркамі адказалі, што, на жаль, не могуць «задаволіць патрэбы ўсіх кліентаў», бо адныя і тыя асобы ў кагосьці выклікаюць негатыў, а ў кагосці – пазітыўную рэакцыю: «На любога блогера, на любую папулярную асобу будуць як нейкія негатыўныя каментары, так і пазітыў». Шмат каму супраца «Mark Formelle» з Вольгай Бузавай вельмі спадабалася, запэўнілі ў кампаніі.
Дарэчы, на калекцыі з беларускай сімволікай таксама не заўсёды пазітыўная рэакцыя, паведаміла нашая суразмоўца. Напрыклад «Белавежскую пушчу», якая выйшла не так даўно, крытыкавалі.
«Чым жа «Беларуская пушча» не спадабалася? – здзівіліся мы. – Можа, што занадта беларуская?» «Ну, хутчэй так», – пагадзілася суразмоўца. У кампаніі не ведаюць, ці гэтыя негатыўныя водгукі пакідалі беларускія пакупнікі, ці гэта грамадзяне іншых краінаў, у якіх прадаецца прадукцыя «Mark Formelle».
Што да палітычных поглядаў Вольгі Бузавай і падтрымання вайны, то гэта вытворцу не цікавіць:
,,«Мы не глядзім на ейныя палітычныя погляды. Усё ж мы глядзім на яе як на асобу, на ейную кар'еру і ўсё такое».
Верагодна, для пакупнікоў гэта таксама не важна, бо калекцыя прадаецца добра, распавялі на прадпрыемстве. «Ёсць жа ў любым выпадку людзі, якія любяць яе за нейкую творчасць. Пра палітычныя погляды ніхто, канечне ж, не кажа. Гэтага ніхто не закранае», – патлумачылі там.
Як вынікае з размовы, «Mark Formelle» не мае намеру адмаўляцца ад беларускай тэматыкі, але якімі будуць наступныя калекцыі, нам не распавялі. «На жаль, не магу падказаць, што будзе далей, якія далей будуць выпускацца мадэлі», – сказала суразмоўца. Нічога яна не змагла паведаміць і пра лёс ранейшых калекцыяў у бел-чырвона-белых колерах.
«Mark Formelle» – беларуская група кампаніяў, заснаваная ў 1994 годзе. Кампанія пачынала з вытворчасці жаночай бялізны і купальнікаў для нямецкага брэнду, у 2005 годзе стала вырабляць уласную прадукцыю, а ў 2009-м стварыла брэнд «Mark Formelle». Цяпер кампанія мае 23 уласныя фабрыкі і 330 фірмовых крамаў у Беларусі, Расеі і Узбекістане, уваходзіць у лік найбуйнейшых гандлёвых сетак Беларусі.
Прадукцыя кампанія рэгулярна робіць адсылкі да Беларусі – ад надпісаў па-беларуску да калекцыі з партрэтамі Сапегаў і Радзівілаў.
Дар'я Форман, Алесь Наваборскі belsat.eu
